Taravari i shqetësuar për BE! “Nuk po shoh se së shpejti do të gjendet zgjidhje”

Ministri Arben Taravari është i shqetësuar për rrugën eurointegruese. Ai nuk pret që së shpejti të gjendet zgjidhje për zhbllokim.

Taravari vitin e kaluar ishte optimist për hapjen e klasterëve, kur ende ishte aktuale tema për largimin e mundshëm e VLEN-it nga qeveria nëse nuk votohen ndryshimet kushtetuese.

“Unë jam i bindur se kjo qeveri do t’i nisë negociatat, nuk dua të jem tepër ambicioz se ndoshta edhe do t’i përfundojmë gjatë mandatit të kësaj qeverie” pati deklaruar në qershor të vitit të kalaur,  Arben Taravari.

Sipas analistit Bllagojçe Atanasovski çështja e rrugës eurointegruese mund të ndikojë në VLEN në zgjedhjet e ardhshme lokale.

“VLEN si koalicion politik i gënjeu, i manipuloi dhe i zhgënjeu me shumë gjasa votuesit e saj kur para zgjedhjeve vitin e kaluar dhe pas kësaj, dha një periudhë grejs nga 6 muaj, tre muaj për kushtëzim të pjesëmarrjes së koalicionit me votim, përkatësisht për vazhdimin e procesit eurointegrues dhe votimin e ndryshimeve kushtetuese. Shohim se  nuk ka asgjë nga kjo”, tha Atanasovski.

Ministri Taravari përsëriti se për VLEN eurointegrimet mbeten prioritet, por për zhbllokim, siç shtoi, më i rëndësishëm është qëndrimi i partnerit të koalicionit VMRO-DPMNE i cili i ka 58 deputetë, për shkak se pa ta nuk mund të realizohen ndryshimet kushtetuese.