Mbikëqyrja e punimeve në një trotuar në rrugë kryesore, për pak sa nuk përfundoi me fatalitet për kryetarin e komunës së Haraçinës, Ridvan Ibrahimi. Ai së bashku me sigurimin dhe shoferin e tij, u sulmuan me armë zjarri nga persona të panjohur. Kryetari Ibrahimi ka shpëtuar pa lëndime, por shoferi dhe sigurimi kanë mbetur të plagosur në vendngjarje.
“Sulm me armë zjarri ka pasur sot në fshatin Haraçinë të Shkupit ku cak i sulmit ka qenë kryetari i kësaj komune, Ridvan Ibrahimi por i njëjti ka përfunduar pa lëndime. Të plagosur kanë mbetur dy persona të tjerë, bëhet fjalë për sigurimin dhe shoferin e kryetarit të komunës. Bëhet fjalë për personat E.S dhe A.A. Ngjarja ka ndodhur këtu prapa meje, në momentin kur kryetari i komunës Ridvan Ibrahimi ka mbikëqyrur një trotuar si po zhvillohen punimet dhe në atë moment ka ndodhur sulmi me armë. Për momentin inspektorët po bëjnë mbikqyrje te vendi i ngjarjes për të mbledhur shenjat e dëshmive”, raporton gazetari i TV21, Zekirija Haxhiu.
Rastin e konfirmojnë edhe nga Ministria e Punëve të Brendshme. Sipas njoftimit, ngjarja ka ndodhur në ora 13:25 ndërsa është gjuajtur me pushkë automatike.
“Sot, 1 prill 2024, në orën 13:25 në SPB Shkup është raportuar se në hyrje të fshatit Haraçinë, një burrë ka qëlluar me pushkë automatike në drejtim të kryetarit të komunës R.I, i cili ishte së bashku me disa persona të tjerë. Dy persona kanë mbetur të plagosur, të cilët ndodheshin me kryetarin e komunës. Kryetari i komunës nuk ka pësuar lëndime dhe nuk janë të sakta as spekulimet e publikuara në disa portale se ka mbetur i plagosur një punonjës policie”, thanë nga MPB-ja.
Më i plagosur rëndë ka mbetur personi A.A , 21 vjeç. Atij në Klinikën Torakale në Shkup i është mënjanuar një pjesë e mushkërisë, ndërsa i plagosuri tjetër E.S i cili është i shtrirë në Spitalin e Qytetit Shën Naumi, është në gjendje të mirë shëndetësore, respektivisht në vetëdije.
“D.m.th. Pacienti ka pasur një plagë me armë zjarri, me çrast i është dëmtuar pjesa e djathtë e mushkërisë, është bërë një intervenim kirurgjik me të cilën është mënjanuar njëra pjesë e mushkërisë së anës së djathtë. Pacienti normal është në gjendje të shokuar, natën do ta kalojë në kujdes intensiv, më tej do të shohim se si do të zhvillohet situata e tij”, tha Nexhati Jakupi, drejtor i Klinikës Torakale.
Ende nuk dihen zyrtarisht motivet e sulmit, por spekulohet se bëhet fjalë për probleme të vjetra pronësore, respektivisht për tokën në pronë shtetërore, ku është paraparë të ndërtohet stadium futbolli.
Për shkak incidentit me armë, thuajse e gjithë Haraçina sot ishte e bllokuar nga policia. Sulmuesit kërkoheshin gjithandej, madje edhe me helikopter. Nuk lejohej qarkullimi me vetura, e as kalimi i këmbësorëve afër vendit të ngjarjes. Më së shumti e pësonin nxënësit e shkollave fillore të cilët dëshironin të kthehen në shtëpi, por nuk lejoheshin nga policia. Policia kishte bllokuar rrugën që nga qarkorja në hyrje të Haraçinës, e qytetarët detyroheshin të ecin në këmbë deri në shtëpi.