Kandidati për kryetar të Zhelinës nga AKI, Emir Sulejmani tha se është fatkeqësi që edhe në këto zgjedhje duhet të flitet për gjëra elementare si uji i pijshëm, kanalizimi e infrastruktura. Në Debat21, Sulejmani tregoi projektet me prioritet që siç tha, do të ndërtohen rrugë e do të ketë ujësjellës funksional për të gjitha vendbanimet.
“Sa u përket projekteve konkrete, në infrastrukturë ne kemi paraparë ndërtimin e të gjitha rrugëve të cilat nuk janë. Kemi paraparë ndërtimin e rrugës Striminicë-Saraçinë, Strimincë-Zhelinë, dy rrugë të cilat kanë mbetur pa asfaltuar në fshatin Zhelinë, rrugët nëpër vendbanimet e Dervenit. Nga 17 vendbanime të Zhelinës, në 15 nuk kemi ujësjellës funksional. Fatkeqësisht për 8 vite nuk u arrit që asnjë vendbanim të ketë ujësjellës funksional. Kemi probleme sa i përket çështjes së arsimit”, tha Emir Sulejmani.
Në anën tjetër, kryetari aktual, njëherit edhe kandidat i VLEN për Zhelinën, Blerim Sejdiu tha se në “Zhelina tani ka marrë pamjen e një qyteti” dhe se “është transformuar e gjithë komuna”. Sejdiu tha se në këtë mandat do të ndërtohen qendra klinike, salla sporti, rrugë e do të punohet edhe në turizëm
“Të gjitha rrugët që lidhin fshatrat tona ne do t’i bëjmë realitet. Ne nuk jemi ndalur, me rrugët, me mbeturinat që i hoqëm, me shkollat që jemi duke i renovu. Në Merovë jemi ujësjellësin duke e bërë, në Kapazhdoll e përfunduam, me rrjetat e kanalizimit dhe ajo që është një projekt gjigand është stacioni i filtrimit që e kem projektin në përfundim e sipër dhe mandatin e ardhshëm e jap fjalën se do ta ndërtojmë stacionin e filtrimit të ujërave të zeza”, tha Blerim Sejdiu.