Spasovski në Haraçinë, si Kryeministër apo LSDM? Filipçe kërcënon Ziberin me shkarkim nga detyra

Oliver Spasovski ishte në Haraçinë për të mbikëqyrë punimet për kanalizimin. Aktiviteti u njoftua nga Qeveria dhe Spasovski gjatë gjithë kohës përmendte projektet në rolin e kryeministrit. Megjithatë, në këtë ngjarje paraprakisht u ndanë maska të cilat paraqesin material propagandues të koalicionit “Mundemi” ku Spasovski është bartës i listës. Kur TV21 e pyeti a mundet të na sqarojë se pse po keqpërdoren aktivitetet qeveritare për të shpërndarë material propagandues, ai tha se maskat ka mundur t’i shpërndajë ndonjë simpatizant i partisë dhe ai nuk mban përgjegjësi për atë.

Oliver Spasovski, kryeministër teknik:
-“Absolutisht askush prej nesh nuk shpërndan materiale të tilla propaganduese, përndryshe nëse shpërndahen diku tjetër materiale propaganduese, fushata ka nisur, aktivistët partiakë mund të bëjnë çka të duan. Kjo është ngjarje e Qeverisë.

TV21: Ne pamë se si shpërndahen maska.
-“Duhet të pyesni se kush po i shpërndan, ndoshta, nëse janë aktivistë partiakë ata që i shpërndajnë maskat, kjo është puna e partive. Për momentin, deri në orën 16:30,  as unë as dikush prej ministrave nuk hyjmë në fushatë zgjedhore”

Nga ana tjetër drejtori i Qendrës së Shëndetit Publik, Arben Ziberi, në rrjetin social kishte shkruar se ka ndikuar që të hapen kufijtë pa kushte që t’ua hapte rrugën mërgimtarët për t’u kthyer në vendlindje për të votuar për kandidatin për kryeministër që e propozoi partia nga ku vjen ai.

“Unë si anëtar i Komisionit për Sëmundje Infektive dhe anëtarët tjerë, kontribuuam që kufijtë të hapen dhe njerëzit të mund të lëvizin më lirshëm pa ngarkesa protokollare që i rekomandonin nga OBSH. Pse Jo, të mos vijnë në vendlindje, për Kryeministrin Shqiptar!” Tha Arben Ziberi, drejtor i QSHP-së.

Për shkak të kësaj, ministri i Shëndetësisë, Venko Filipçe tha se do ta shqyrtojë shkarkimin e Ziberit nga posti i drejtorit.

“Unë sot do të konsultohem me juristë. Dhe nëse mundet, drejtori do të shkarkohet qysh sot”, tha Venko Filipçe, ministër i Shëndetësisë.

Filipçes i reagoi Ziberi.

“Ministër Filipçe, ndaloni ta keqpërdorni foltoren e Qeverisë për qëllime zgjedhore. Unë jam kandidat për deputet dhe kam të drejtën time që në profilin personal në Facebook të kem qëndrime politike, e përskaj kësaj në asnjë moment nuk e kam keqpërdorur institucionin që e drejtoj, gjë që për fat të keq e bën Ministri Filipçe me këto deklarata me prapavijë zgjedhore”, tha Arben Ziberi, drejtor i SHSHP.

Për të dy rastet pyetëm Komisionin për Antikorrupsion.

Për rastin e Spasovskit –thanë se nuk kanë njohuri. Në rast se sigurojnë materiale se janë ndarë maska, do të shqyrtojnë rastin dhe do të sjellin vendim.

Për rastin e dytë – thanë se tashmë kanë realizuar mbledhje dhe është vlerësuar se:

– Drejtori mund të bëjë shkelje të Ligjit se fushatën zgjedhore e ka realizuar gjatë orarit të punës, pavarësisht asaj se këtë a e ka bërë në rrjete sociale ose në vend pune.
– Ministri ka të drejtë ta shkarkojë Ziberin nëse vëren se ka bërë shkelje të ligjit, sepse Kodi zgjedhor nuk ndalon shkarkime, por vetëm ndërprerje të marrëdhënieve të punës dhe punësimet.

Ziberi statusin e ka bërë në ora 21:00.

Përndryshe, kodi zgjedhor parasheh që gjatë fushatës funksionarët shtetëror nuk mund të realizojnë promovime për nisjen dhe përfundimin e projekteve.