Ministri i Punëve të Brendshme, Oliver Spasovski nuk dha detaje se si marihuana u mor nga një vend tjetër dhe u dërgua në Haraçinë të Shkupit pa u kapur. Ai më tej tha se kërkohet paraburgim për 8 personat e dyshuar deri më tani. Spasovski nuk iu përgjigj disa pyetjeve të gazetarëve duke thënë se për momentin po vazhdon hetimi dhe përgjigjet mund të dëmtojnë procesin e investigimit.
“Ka qenë një aksion i madh dhe i ndërlikuar që është zhvilluar në territorin e Haraçinës, mbrëmë kemi dhënë informata për publikun me informacione që janë të qasshme për publikun, duke marrë parasysh se hetimi ende vazhdon. Po ka zgjerim të hetimit. Megjithatë nuk mundet hetimin ta zhvillojmë përmes mediave, ju lutem për mirëkuptim, sepse çdo informatë e plasuar në media mund të dëmtoj procesin e hetimit”, tha Spasovski.
Ministri i Brendëshm nuk dha sqarime se si të dyshuarit kanë arritur ta bartin marihuanën në 137 kilometra pa u kapur dhe të arrijë deri në Haraçinë.
“Ka shumë detaje, në punën kriminalistike jo vetëm për këtë rast megjithatë këtë do të tregojë hetimi dhe ne fund do ti kemi të gjitha informacionet”, deklaroi Spasovski. Gjatë ditës së djeshme janë arrestuar 6 persona ndërsa edhe sot 2 persona që janë të dyshuar, ndërsa hetimi për zbardhjen e plotë të rastit ende vazhdon.