Talat Xhaferi sot kaloi në krye të Qeverisë së Maqedonisë së Veriut, përcjell TV21. Edhe pse vetëm për 100 ditë, Xhaferi bëhet kryeministri i parë shqiptar në Maqedoninë e Veriut.
Ndoshta nuk e keni ditur që ai ka “sozinë” e tij në Kosovë, përcjell TV21. Xhaferi ka një ngjashmëri të madhe në pamje me artistin e mirënjohur kosovar, Dibran Tahiri.
Aktori nga Kosova në publik njihet me rolin e “Dinit” (Shemsidin Gashit) në serialin “Familja Moderne”.
Tahiri vjen nga Mitrovica, ndërsa Xhaferi nga Forina e Gostivarit.
E përbashkëta e Xhaferit dhe Tahirit është që një pjesë të shkollimit të tyre, e kanë bërë në Beograd.
Tahiri në fillim studioi në Shkollën e Lartë Pedagogjike në Prishtinë në degën e aktrimit, më pastaj mbaroi studimet Universitare për aktor edhe në Fakultetin e Arteve Dramatike në Universitetin e Beogradit. Është një ndër themeluesit e degës së Artit Dramatik dhe Akademisë së Arteve në Universitetin e Prishtinës në vitin 1989, kur ai u kthye nga Beogradi për të ligjëruar lëndën e aktrimit në këtë Universitet dhe formoi kuadro të reja të aktorëve në Kosovë.
Ndërsa Xhaferi vazhdoi shkollimin e mesëm në Shkollën e Lartë Ushtarake të Beogradit. Ai studioi në Akademinë Ushtarake të Tokës Këmbësorike të Ushtrisë Popullore Jugosllave (JNA) në Beograd dhe Sarajeve dhe u specializua në detyra komanduese dhe të stafit në Akademinë Ushtarake “Gjenerali Mihailo Apostolski” në Shkup. Nga viti 1985 deri në vitin 1991 ishte një oficer i APJ-së dhe prej vitit 1992 deri në 2001 ishte oficer i Armatës së Republikës së Maqedonisë (ARM).
Gjatë kryengritjes së vitit 2001, në të cilën shqiptarët në krye me Ali Ahmetin nisën luftën për të drejta të shqiptarëve në Maqedoni, Xhaferi ishte në fillim një oficer i lartë në ARM, duke komanduar trupa në kazermat e Tetovës.
Më 28 prill, ai ishte në detyrë si komandant në kazermë. Disa ditë më vonë ai u largua dhe u bashkua me Ushtrinë Çlirimtare Kombëtare (UÇK), dhe u bë komandanti i saj i Brigadës 116 me nofkën e “komandant Forina”, nga vendlindja e tij. Ai u amnistua më vonë, pas Marrëveshjes së Ohrit./tv21.tv