Banorët e Vizbegut ka kohë që kërkojnë ndërtimin e shkollës fillore. Ish-kryetari i komunës së Butelit, Velimir Smilevski, i cili që në rrethin e parë i humbi zgjedhjet lokale, në rrjetin social Facebook shkroi se ka përfunduar ankandi elektronik për ndërtimin e shkollës në Vizbeg.
“Përgëzime për banorët e Vizbegut, ka përfunduar ankandi elektronik për ndërtimin e shkollës fillore.
Është përzgjedhur firma “Hilding Komerc”eksport import Tetovë, për shumën prej 90.311.197 denarë.
Ju qoftë për hajër”, shkruan ish-kryetari i Komunës së Butelit, Velimir Smilevski.
TV21 kontaktoi edhe me kompaninë “Hilding Komerc” që ka marr përsipër ndërtimin e shkollës. Nga atje i thanë TV21 se nuk dihet ende kur do të fillojë ndërtimi i shkollës për shkak se nuk kanë përfunduar të gjitha procedurat e tenderimit.
“Po, firma jonë e ka fituar tenderin për ndërtimin e shkollës në Vizbeg të Shkupit – komuna e Butelit, faza e parë e tenderimit ka përfunduar më 02.11.2021, d.m.th aukcioni, mirëpo ende nuk kanë mbaruar te gjitha procedurat, në moment që do të mbarojnë do te kemi mundësi t’u japim me shumë informacione”, thonë nga Kompania “Hilding Komerc”.
Banorët e Vizbegut në fushatë zgjedhore protestuan dhe bllokuan rrugët kryesore duke kërkuar që të zgjidhet ky problem nga cilido kryetar i ardhshëm, që fëmijët e tyre mos të udhëtojnë më me kilometra për t’u shkolluar në komuna tjera. Nxënësit e Vizbegut bëjnë rreth 4 km për të arritur në shkollën më të afërt.