Skandal, të dhënat e 1.5 miliardë përdoruesve të Facebook-ut mund të jenë shitur te hakerët

Një alarm është dhënë globalisht pasi të dhënat personale të miliarda përdoruesve të Facebook, duket se janë në dispozicion për hakerët. Kjo vjen në një kohë kur gjiganti teknologjik bashkë me platformat e tij, Instagram dhe WhatsApp ka rënë në të gjithë botën. Raportet që kanë dalë në dritë flasin për shitjen e të dhënave të 1.5 miliardë përdoruesve në një forum të njohur të hakerave, shkruan “The Mirror” duke cituar Miklos Zoltan.

Zoltan shkruan: “Në fund të shtatorit 2021, një përdorues i një forumi të njohur hakerësh postoi një njoftim duke pretenduar se posedon të dhënat personale të më shumë se 1.5 miliardë përdoruesve të Facebook. Të dhënat aktualisht janë në shitje në platformën përkatëse të forumit, me blerës potencialë duke pasur mundësinë për të blerë të gjitha të dhënat menjëherë ose në sasi më të vogla.”

Dyshohet se hakeri posedonte informacionin që përfshinte të dhënat si emri, adresa e postës elektronike, vendndodhja, gjinia, numri i telefonit dhe ID-ja e përdoruesit. Sakaq, thuhet se Facebook dhe Instagram janë tërhequr nga Sistemi i Emërtimit të Internetit (DNS), ndërsa emrat e domain-ve Facebook, Instagram dhe WhatsApp janë regjistruar për shitje.

Për më tepër, gazetarja e teknologjisë, Sira Frenkel citoi burime pranë kompanisë, të cilët janë shprehur se nuk mund të futen në zyra. Aksionet e Facebook kanë rënë 5.2% sot, duke i kushtuar Mark Zuckerberg rreth 7 miliardë dollarë pasuri.  Kjo është goditja e dytë për Facebook, pasi vetëm pak orë më parë, u përball me akuza nga një ish punonjëse e saj, e cila tha se kompania kishte ndihmuar në përhapjen e gjuhës së urrejtjes në këmbim të fitimeve.