“Sllovenia, që aktualisht kryeson me Bashkimin Evropian, është bërë gati që në në Bërdo të Kranjit të mirëpresë liderët dhe kryeministrat e shteteve anëtare të Unionit si dhe ata të Ballkanit Perëndimor”, raporton nga Lublana gazetari i TV21, Besir Arifi.
Pas një darke joformale, mëngjesin e nesërm liderët do të mblidhen në Samitin BE-Ballkani Perëndimor, që do të drejtohet nga kryetari i Këshillit Sharl Mishel e këtu do të jetë edhe kryetarja e Komisionit, Ursula von der Lejen. Sipas paralajmërimeve, pika e parë e diskutimit pritet të “jetë riafirmimi i perspektivës evropiane të Ballkanit Perëndimor, si interes dhe zgjedhje e përbashkët strategjike”!
“Ky është Samit joformal dhe nuk sjell ndonjë vendim, megjithatë pritet që me një deklaratë të përbashkët BE-ja edhe një herë të rikonfirmojë fokusin për zgjerim drejt Ballkanit Perëndimor! E ajo që për momentin pengon eurointegrimet e Maqedonisë së Veriut, e edhe të Shqipërisë, është vetoja bullgare ndaj Shkupit”, raporton më tej gazetari Arifi.
Kryeministri i vendit Zoran Zaev, po edhe ai teknik i Bullgarisë, tashmë kanë dërguar sinjalet e para për zhvillim pozitiv të bisedimeve, e kjo po jep shpresë që ndoshta zhbllokimi mund të ndodhë në Këshillin për Punë të Përgjithshme në dhjetor!
“Për Maqedoninë e Veriut dhe Shqipërinë është veçanërisht e rëndësishme, sepse jemi shteti që pret më së shumti, 16 vjet e gjysmë, me ne e lidhur është edhe Shqipëria dhe presim që do të dërgohet mesazhi pozitiv për Konferencën e parë ndërqeveritare deri në fund të vitit, si shpresë, si shans që për herë të parë të vendoset diku në mes të dhjetorit. Këto janë pritshmëritë. Dua të konfirmoj se nesër në mëngjes pune filloj takimet me komisionerit Varhejli dhe kryeministrin e Sllovenisë si vend kryesues me Këshillin Evropian dhe bashkë me Presidentin Radev, e menjëherë pas kësaj do të kem takim me kancelaren Merkel, me Presidentin Makron dhe Presidentin Radev”, tha Zaev.
Burimet diplomatike janë shprehur se BE mbështet vazhdimin e bisedimeve Shkup-Sofje, ndërsa shtojnë se ky Samit është mundësi e mirë që krerët e dy vendeve të takohen dhe të bisedojnë.
“Krahas mbështetjes për zgjerimin, çështje tjera që pritet të diskutohen në Samitin e nesërm, janë bashkëpunimi BE-Ballkan për rimëkëmbje socio-ekonomike në kohë pandemie, intensifikimi i bashkëpunimit rajonal, zbatimi i Planit Ekonomik dhe Investues dhe bashkëpunimi me rajonin për çështje politike dhe të sigurisë.
Besir Arifi, TV21, Lublanë.