Mungesën e derivateve në disa pompa të benzinës zëvendëskryeministri për çështje ekonomike Fatmir Bytyqi e arsyeton me rritjen e konsumit gjatë fundjavës dhe jo si pasojë e keqpërdorimeve eventuale nga ana e pompave të benzinës.
Ai mbrëmë në Click Plus tha se janë shitur 200 tonë naftë vetëm këtë fundjavë, derisa shitja e zakonshme arrin deri në 40 tonë.
“Ka ndodh për shkak të rritjes së konsumit. Vetëm një prej kompanive që furnizon popullatën mesatarisht në 5 vitet e fundit për vikend shet 40 tonë në Maqedoni naftë. Vetëm këtë vikend ka shitur 200 tonë”.
Megjithatë Bytyqi siguron se në vend nuk ka nevojë për panik pasi që Rusia nuk është burim i furnizimit.
“Është e vërtetë se në treg nuk ka nevojë për panik nëse do ketë apo s’do ketë derivate të naftës.
-Pse po thoni se nuk ka nevojë për panik?
-Sepse burimi i furnizimit tonë nuk është prej naftës së Rusisë”.
Zëvendëskryeministri Bytyqi vlerëson se në vend se të flitet për rritje të çmimeve dhe shpenzimeve, është mirë që qytetarët të fillojnë të kursejnë.
“Ne të gjithë po flasim për çmime të larta të derivateve, të gjithë po flasim për çmime të larta të energjisë elektrike, po askush nuk po flet për kursimet. Në çdo strategji, në çdo diskutim thotë energjia më e lirë, është ajo që kursehet që nuk harxhohet. Sot në të gjithë botën përdorimi i benzinës quhet luks.”
Ndryshe, në vend se në bazë javore ashtu siç ka funksionuar deri tani, çmimet e reja të naftës dhe derivateve të naftës në bazë ditore do të përcaktohen nga Komisioni Rregullator për Energjetikë, gjegjësisht nga dita e sotme çdo ditë do të ketë ndryshime në çmim.