Sistemi për kontroll duhet të përmirësohet! Korrupsioni në furnizimet publike në ndërmarrjet publike?

Dobësi serioze janë regjistruar në procesin e zbatimit të furnizimeve publike në ndërmarrjet publike dhe shoqëritë aksionare. Situata e këtillë, sipas Qendrës për komunikime civile e imponon nevojën për vendosje të mekanizmave për luftë kundër korrupsionit.

 “Fatkeqësisht deri më tani më shumë flasim për korrupsion në furnizimet publike, ndërsa nuk pamë asnjë mekanizëm praktik që e  implementojnë institucionet”, tha Sabina Fakiq nga Qendra për komunikime civile.

Me vullnet politik do të punojmë për çrrënjosjen e kësaj dukurie dhe përforcim të luftës kundër korrupsionit gjatë furnizimeve publike, tha zv/kryeministri për luftë kundër korrupsionit Lupço Nikollovski në debat që e organizoi Qendra. Furnizimet publike janë rregulluar me ligje të rrepta dhe po bëhet përpjekje serioze për mbrojtje nga mundësia për keqpërdorim.

 “Andaj jemi orientuar drejt krijimit të masave sistematike dhe politikave për ulje të rrezikut për korrupsion gjatë furnizimeve publike në ndërmarrjet shtetërore”, theksoi Lupço Nikollovski – zëvendëskryeministër për luftë kundër korrupsionit.

Sipas Nikollovskit edhe krahas faktit që transparenca gjatë shpenzimeve të institucioneve shtetërore në tre vitet e kaluara është në nivel më të lartë, megjithatë ende ekzistojnë rreziqe të mëdha për korrupsion. Hulumtimi i Qendrës tregon se ka rreziqe për korrupsion përmes ndryshimeve të shpeshta të planeve për furnizimet publike, përmes dorëzimit të një oferte, marrëveshjeve të kompanive, me qëllim që njëra tjetrës ta mundësojnë marrjen e tenderit. Kishte sugjerime edhe për problemin që persona të njëjtë një kohë të gjatë mbeten në pozita të larta në pjesën e furnizimeve publike. Andaj, personat kompetentë theksojnë se nevojitet rotacion për shkak se një person kur është në një pozitë shumë gjatë, mund t’i nënshtrohet presioneve.