Nga 1349 administratorët shtëpiak, 1180 kanë firmosur vendimin e shpërndarjes, 135 nuk janë paraqitur fare të nënshkruajnë, ndërsa 26 kanë refuzuar të nënshkruajnë vendimet e reja të punës, informojnë nga Ministria për Sistem Politik dhe Marrëdhënie mes Bashkësive.
“Brenda afatit ligjor, Ministria për sistem politik do t’u shpërndajë vendimet edhe 135 nëpunësve administrativ që nuk janë paraqitur fare. Të punësuarit që nuk kanë nënshkruar vendimet, u pushon vendi i punës në Ministrinë për Sistem Politik dhe Marrëdhënie ndërmjet Bashkësive dhe të njëjtit evidentohen në listën për transfer të Ministrisë për Shoqëri Informatike dhe Administratë”, thonë nga Ministria për Sistem Politik dhe Marrëdhënie mes Bashkësive.
Vendosja në transfer listë nënkupton përpjekje për ta lidhur nëpunësin me një institucion tjetër, tregon për TV21 Ministri i Administratës Publike, Jeton Shaqiri. Afatin kohor të qëndrimit në këtë listë ende nuk e zbulon, por tregon se nëpunësi nuk do të ketë më shumë se dy shanse.
“Kjo transfer listë ka raste kur disa të punësuar pasi që vijnë në transfer listë nuk janë të interesuar dhe kalojnë nga sektori publik në sektorin privat. Në qoftë se 1 herë apo 2 herë nuk pranojnë një vend apo pozicionim tjetër, me ndryshimet e reja ligjore që do të parashohin edhe afat kohor se sa mund të ketë një i punësuar në listën transfer”, deklaroi për TV21, Jeton Shaqiri – Ministër i Shoqërisë Informatike dhe Administratës.
Ministri për Sistem Politik, Artan Grubi, pat thënë se nga 1 shkurti administratorët e shpërndarë duhet të nisin me punë, por se kjo ende nuk ka nisur të zbatohet e dëshmon deklarata e djeshme e kryetares së këshillit të inspektorëve.
“Informacionet që unë i kam nga drejtorët është se personat ende nuk janë sistemuar, nuk kanë filluar me punë, për këtë është e nevojshme të zbatohet e gjithë procedura që do të niset përmes Ministrisë për Sistem Politik për transferimet që duhet të kryhen”, potencoi Magdalena F.Grashkoska – Drejtoreshë e Këshillit Inspektues.
Ndonëse 1 shkurti ka kaluar, në njoftimin e dërguar sot nga Ministria për Sistem Politik thonë se administratorët që kanë firmosur, do të nisin me punë brenda afatit të paraparë me ligj. Shtojnë në afat prej 30 ditësh nga miratimi i Planit, udhëheqësit e institucioneve janë të detyruar të fillojnë procedurën e harmonizimit të akteve për sistematizim në vendet e punës me dispozitat e ligjit për transfer të nëpunësve administrative. Ndërkaq, Ministri i Administratës thotë se mbi 20% e institucioneve i kanë përshtatur aktet e sistematizimit. Kundërshtime nga ndonjë institucion deri më tani nuk ka pasur.
“Me plot përgjegjësi e them se asnjë deri sot në Ministrinë për Shoqëri informatike dhe administratë nuk ka pasur kundërshtim deri në procesin që ata janë në komunikim me sektorë të ministrisë dhe pjesë të kabinetit tim”, u shpreh për TV21, ministri i Shoqërisë Informatike dhe Administratës, Jeton Shaqiri.
Administratorët që për vite me radhë merrnin paga duke qëndruar në shtëpi, do të sistemohen në 237 institucione publike. Ministria e Brendshme do të marr numrin më të madh, gjegjësisht rreth 150 administratorë.