Si do të reformohen ministritë? Pritet që Ekonomisë t’i hiqet Energjetika, dhe të bëhet ministri më vete

Do të ketë reformim të Ministrive. Kjo u pat paralajmërua nga kreu i VMRO-DPMNE-së Hristijan Mickoski, ndërsa sot në DailyClick u konfirmua edhe nga Besar Durimshi nga VLEN, koalicion i cili tashmë është në bisedime me DPMNE-në për bashkëqeverisje.

Pritet që Ministrisë së Ekonomisë, t’i largohet sektori i Energjetikës, që do të bëhej ministri më vete, ndërsa në ekonomi të shtohet resori i Punës, i cili do të hiqej nga Ministria e Punës dhe Politikës Sociale. Kësaj të fundit pritet t’i shtohet Demografia dhe Rinia. Ministrisë së Kulturës pritet t’i shtohet Turizmi. Gjithashtu, Ministria për Sistem Politik dhe Marrdhënie mes komuniteteve do të mbetet vetëm për marrëdhënie mes komuniteteve. Ministri tjera që parashihet të formohen janë Ministria e Sportit si dhe Ministria për Transformim Digjital.

Sipas Besar Durmishit nga koalicioni VLEN, këto ndryshime janë pak të rëndësishme. Pak të rëndësishme sipas tij është edhe ajo se cila ministri nga cila parti politike do të udhëhiqet. Thotë se çdo ndryshim duhet të miratohet nga 2/3 e deputetëve në Kuvend.

“Pak e rëndësishme është nëqoftëse do t’i largohet energjetika ministrisë së ekonomisë, a do të jetë e rëndësishme nëse do të jetë e VLEN-it apo VMRO-së. Nuk është kjo intenca sa është intenca që të bëhet reformatimi i ministrive por duhet të potencoj që edhe ndryshimet që do të bëhen të ministrive, duhet të kalojnë me 2/3 e votave në Parlament. Kemi ministrinë e sportit si ministri shtesë që do të jetë ndërsa në ministrinë e ekonomisë me sa e di energjetika do të largohet dhe do të meret e punës. Ministrisë së Politikës Sociale do t’i shtohet demografia dhe rinia”, tha Besar Durmishi.

Por Jeton Shaqiri nga Fronti Europian nuk u pajtua me Durmishin në debatin në DailyClick. Thotë se pikërisht fuqia politike e resoreve rrjedhë nga obligimet dhe detyrat që i kanë po ato resorë. Pyet se si do të promovohet turizmi përmes kulturës?

“Por nuk mund ta quajmë se është e parëndësishme. Për arsye sepse fuqia politike e resorëve dhe përfaqësimi i tyre në kabinetin qeveritar jep nga obligimet dhe detyrave të cilat i kanë të gjitha resorët. Dhe për atë arsye nuk mund ta quajmë të parëndësishme. Nuk mund ta quajmë nëse turizmi shkon te kultura. Si do të promovohet ai turizëm përmes kulturës?”, deklaroi Jeton Shaqiri.

VMRO-DPMNE në programin e saj gjithashtu ka paraparë ulje për 10% të institucioneve publike, heqja e tërësishme e pozitës zëvendësdrejtor, si dhe uljen e bordeve ekzekutive dhe mbikëqyrëse si dhe pjesëmarrësve në to.