Shkollat fillore në vend po i bëjnë gati listat e nxënësve të cilët nga shtatori do të mësojnë me pajisje teknologjike. Drejtoresha e shkollës fillore “Ismail Qemali” në Çair, Burbuqe Ymeri, thotë në këtë shkollë ka 120 nxënës të klasës së tretë. 100 prej tyre nuk kanë tablete, ndërsa vetëm 20 nxënës kanë kushte për tu pajisur me mjete teknologjike. Ajo thotë se nesër është afati i fundit për të dërguar listën e nxënësve.
“Kjo në kushtet tona nuk është e mundur të realizohet. Prej shkollës tonë e kemi bërë anketën me prindërit e klasave të treta që në shtator do të jenë klasa e katërt, 80% nuk kanë pajisje të duhur që të mësojnë nëpërmjet telefonit”, tha Burbuqe Ymeri – Drejtoreshë e SHF “Ismail Qemali”.
Pyetëm edhe në shkolla tjera fillore në vend. Në shkollën fillore “Gjergj Kastriot-Skënderbeu” në Haraçinë prindërit nuk pranojnë që fëmijët e tyre të mësojnë me libra digjital, ndërsa edhe shkolla “Penko” në Butel po e bën gati listën e nxënësve që nuk kanë mundësi për pajisje.
Ka reaguar kryetari i Unionit të Nxënësve të Shkollave të Mesme, Blendi Hodai. Ai tha se nuk janë kundër digjitalizimit, por se për këtë duhet të konsultohen nxënësit dhe prindërit pasi që shumica e tyre nuk kanë pajisje dhe internet.
“Kjo është e papranueshme për ne sepse nuk mundet ministrja të vendos për të gjithë nxënësit se si ata do të mësojnë pa u konsultuar me asnjë nxënës, sepse kështu vendime mund të merren nëpër biznese private për punëtorët e nëpër shtëpi me fëmijët. Ndërsa në institucionin që ju drejtoni vendimet duhet t’i merrni duke u konsultuar me ata që pikërisht i prekin këto vendime”, u shpreh Blendi Hodai – Unioni i Nxënësve të shkollave të mesme.
Ministrja e Arsimit Milla Carovska nuk heq dorë nga ky vendim. Ajo disa herë me radhë ka deklaruar se klasat e katërta do të fillojnë të mësojnë me libra digjital nga shtatori, por ka sqaruar se në qoftë se ky proces vështirë realizohet dhe nuk është funksional atëherë ky vendim do të ndërpritet. Carovska ka shtuar se nxënësit të cilët do të refuzojnë të mësojnë në mënyrë digjitale do të kenë opsionin të mësojnë me skripte.