Shumë shpejt mund të bëjmë blerje online përmes ChatGPT

PayPal po bashkëpunon me OpenAI, në mënyrë që përdoruesit të kenë mundësinë të blejnë produkte direkt përmes chatbot-it me inteligjencë artificiale (AI), ChatGPT.

Kjo marrëveshje do të thotë se përdoruesit e PayPal do të mund të kryejnë blerje përmes një sistemi të shpejtë pagesash (instant checkout), dhe shitësit në PayPal mund të përfundojnë transaksionet brenda ChatGPT.

Alex Chriss, presidenti dhe drejtori ekzekutiv i PayPal, tha në një deklaratë se kompania do të krijojë një përvojë ku njerëzit mund të kalojnë “nga biseda te pagesa me vetëm disa klikime”.

Përdoruesit gjithashtu do të kenë qasje në funksionin “wallet” të PayPal në checkout të shpejtë, duke përfshirë aksesin në bankën e tyre, bilancin dhe kartat. Përmes OpenAI, përdoruesit e PayPal gjithashtu do të mund të ndjekin blerjet e tyre dhe të bëjnë ankimime për mosmarrëveshje.

Për shitësit që janë të interesuar të shesin, PayPal tha se do të menaxhojë “udhëzimin e tregtarit, verifikimin e pagesave dhe orkestrimin” prapa skenave, në mënyrë që “mijëra” produkte të jenë të disponueshme për blerje në ChatGPT.

OpenAI tashmë ka nisur të hyjë në tregun e e-commerce me nisjen e iniciativës “Buy it in ChatGPT”, e cila u lejon të gjithë përdoruesve në Shtetet e Bashkuara të blejnë direkt nga shitësit në Etsy.

Në shtator, OpenAI njoftoi se marrëveshje me “mbi një milion tregtarë Shopify”, si kompania e bukurisë Glossier, marka e stilit të jetës së Kim Kardashian, SKIMS, marka e të brendshmeve Spanx dhe dyqani i veshjeve Vuori, do të vijnë së shpejti, dhe do të përfshijnë mundësinë e blerjes së shumë produkteve në një shportë.

OpenAI gjithashtu bëri të disponueshëm në open source “Agentic Commerce Protocol”, kodin burimor që përdori për të krijuar shportën e blerjeve, në mënyrë që zhvilluesit të mund të punojnë mbi të.

Në muajt e fundit, PayPal gjithashtu ka njoftuar marrëveshje blerjeje me Google dhe Perplexity për të krijuar përvoja blerjeje me AI.