Vetëm për një javë janë bërë rreth 120 paraqitje për vendosjen e bombave të rrejshme në objektet shkollore, me çka nxënësit kanë humbur një numër të konsiderueshëm të orëve mësimore. Fakti që për 5 muaj rresht nuk po arrijmë t’i zbulojmë se kush qëndron mbrapa këtyre paraqitjeve, këta persona po inkurajohen edhe më shumë tha për REL, profesori pran fakultetit për siguri Zllate Dimovski.
“Fatkeqësisht ne ende nuk e kemi gjetur modalitetin adekuat dhe për këtë arsye ende kemi paraqitje, por duke mos mundur ta gjejmë, shihet qartë se intensiteti i paraqitjeve për bombë rritet dhe ata janë të inkurajuar se nuk po mundemi t’i zbulojmë, nuk po mundemi t’i parandalojmë”, tha Zllate Dimovski, profesor nga Fakulteti për Siguri.
Për shkak se alarme për bomba ka edhe në Serbi dhe Mal të Zi, por këto vende tashmë kanë arritur ta zgjidhin këtë problem, profesori Dimovski tha se është e mirë që vendet të shkëmbejnë informacione të tilla për tejkalim të situatës.
“Do të jetë e nevojshme të reagojmë në nivel shtetëror dhe të kërkojmë përvojën e tyre, njohuritë dhe aftësitë e tyre, të cilat ata i aplikuan në atë kontekst, për të marrë të dhëna të tilla si të veprohet dhe normalisht ta zbatojmë të njëjtin modalitet tek ne, sepse kemi pothuajse të njëjtën mënyrë të paraqitjeve për bombat e vendosura”, pohoi Zllate Dimovski, profesor nga Fakulteti për Siguri.
Ish-ministri për Shoqëri Informatike dhe Administratë Admirim Aliti, tha se gjatë kohës që ai ka qenë ministër ka ofruar zgjidhjen e këtij problemi, por shtoi se ka mbetur e bllokuar. Sipas tij duhet të krijohet Agjenci për siguri kibernetike e cila në mënyrë shtesë do të merret edhe për këto paraqitje të rrejshme.
“Të kemi Agjenci për siguri kibernetike do të ketë vegla të cilat në 95% të rasteve mund të konstatojnë nëse bëhet fjalë për paraqitje të rrejshme dhe nuk duhet në 95% të rasteve MPB të shkojë në vend ngjarje. Ndoshta vetëm në 5% të rasteve ku mjetet e Agjencisë për siguri kibernetike nuk mundem ta vërtetojnë, atëherë MPB do te duhet të shkojë për kontroll”, pohoi Admirim Aliti, ish-ministër i Shoqërisë Informatike dhe Administratës.
Aliti thotë se MPB po punon sipas një sistemi të vjetër sa i përket përballjes me këtë problem. Nga 26 tetori i vitit 2022 në Shkup dhe disa qytete të vendit, disa herë është denoncuar se në email-adresat e disa shkollave, por më pas edhe të institucioneve, qendrave tregtare, aeroporteve, është dërguar kërcënim për vendosje të bombës. Deri tani, të gjitha denoncimet kanë rezultuar të jenë të rrejshme. MPB, vazhdon të deklarojë se po punon në zbardhjen e tyre, por deri më tani nuk dihet se prej ku vijnë këto kërcënime.