Shuhet doajeni i muzikës popullore shqipe Ismet Peja

Doajeni i muzikës shqipe, Ismet Peja, ka ndërruar jetë sot në moshën 83-vjeçare.

Lajmin për vdekjen e ikonës, siç njoftojnë mediat kosovare, e bëri të ditur djali i tij, këngëtari Visar Peja, i cili në një njoftim tjetër ka treguar se artisti legjendar do të varroset gjatë ditës së sotme.

“Me zemër të pikëlluar lajmërojmë të afërmit, miqtë, shokët dhe dashamiret, se me datë 23.11.2020 ndërroi jetë në moshën 83 vjeçare, babai, vëllai dhe gjyshi jonë i dashur Ismet (Musa) Peja. Varrimi i të ndjerit do të bëhet me datë 23.11.2020 (e hënë) në orën 15:00 në varrezat e qytetit në Gjakovë”, thuhet në njoftim.

Ismet Peja lindi më 27 prill të vitit 1937 në Gjakovë. Babai i tij Musa Peja, ishte po ashtu këngëtar i melosit shqiptar. Që në fëmijëri prej moshës 13-vjeçare filloi të merrej me muzikë.

Albumi i tij i parë doli në vitin 1986 me orkestrën e shoqërisë artistike muzikore “Hajdar Dushi”.

Ai ishte i njohur kryesisht për këngë të vjetra qytetare dhe ishte ndër artistët me përvojë më të gjatë në skenën muzikore shqiptare.

Gjatë karrierës së tij ai solli një sërë projektesh si “Knoma kangen sa t’jam gjall”, “Robi plaket kur don vet” dhe jo vetëm.

Peja gjatë karrierës së tij kishte publikuar një numër të madh të albumeve muzikore dhe katër videokaseta.