Shqipëria me dritë jeshile për në BE, po Maqedonia? Mickoski: Me diktate, jo, faleminderit    

Shqipëria merr dritë jeshile në rrugën drejt BE-së. Jozyrtarisht, konferenca e dytë ndërqeveritare në Tiranë u caktua për më 15 tetor, ndërsa Maqedonia mbetet në dhomën e pritjes. Kryeministri Hristijan Mickoski duke e komentuar gjendjen, thotë se është i gatshëm për dialog. Ai ofroi që ndryshimet kushtetuese të bëhen fakt në të njëjtin moment pasi Bullgaria e ratifikon Protokollin për anëtarësimin e Maqedonisë në BE, përkatësisht në fund të negociatave.

“Nuk duhet më në llogari të lëshimeve nacionale dhe të identitetit, pa garanci, të pranojmë kushte. Sipas meje ky është diktat. Nëse ky është kushti që Maqedonia t’i vazhdojë negociatat, atëherë, e thashë edhe në Bruksel, jo, faleminderit”, tha Hristijan Mickoski.

Mickoski thotë se për vendimin për hapjen e klasterëve negociuese me Shqipërinë e kanë njoftuar në takimin në Bruksel. Nga ana tjetër, zv/kryeministri i parë, Izet Mexhiti thotë se ka pritur informacione zyrtare.

“T’i presim informacionet zyrtare. Qeveria dhe VLEN mbeten të përkushtuar në këtë çështje që është një nga prioritet kryesore e politikave tona dhe shpresojmë të gjejmë zgjidhje të shpejtë”, deklaroi Izet Mexheti.

Kritika të ashpra erdhën nga kryetari i LSDM-së, Venko Filipçe. Ndarjen  e Maqedonisë nga Shqipëria në rrugën drejt BE-së, e vlerësoi si dështim i madh për politikat e pushtetit dhe katastrofë për qytetarët. Sipas tij, Maqedonia mbetet e izoluar.

“VMRO-DPMNE dhe Hristijan Mickoski qytetarëve u kanë plasuar një mashtrim të madh parazgjedhor. Me gënjeshtra dhe manipulime ata u përpoqën që ta fshehin qëllimin e vërtetë, ndërsa qëllimi i vërtetë është se nuk kishin as plan e as nuk duan që shteti të përparojë dhe të zhvillohet drejt BE-së”, tha Venko Filipçe.

Në lidhje me paralajmërimet e Mickoskit për dialog të ri me Bullgarinë, Filipçe tha se me retorikën e ashpërsuar në periudhën e fundit, Maqedonia mund të marrë vetëm një marrëveshje më të keqe.