Në takimin me përfaqësuesen e lartë të BE-së, Kaja Kalas, autoritetet vendase kanë ofruar zgjidhje të mundshme për zhbllokimin e procesit eurointegrues. Një pjesë prej tyre tashmë i përmendi shefja e shtetit, Gordana Siljanovska Davkova, që Parlamenti europian ose Këshilli të miratojnë një akt të veçantë për marrëdhëniet mes Maqedonisë dhe Bullgarisë ose në protokollin e tretë të Marrëveshjes për marrëdhënie të mira fqinjësore të theksohet se nuk do të ketë veto për çështje historike.
“Kemi disa skenarë që i ofruam, është e saktë kjo, për të cilët mendojmë se mund të jenë të përshtatshme për të dy shtetet”, tha zëvendësministrja për Çështje Europiane, Viktorija Trajkov.
Zv/ministrja për çështje europiane Viktorija Trajkov paralajmëroi se për këtë çështje do të punohet me përkushtim në periudhën që vijon, por tani për tani askush nuk lëshon pe.
“Deri më tani ishin të vendosur në qëndrimet e tyre. Nuk lëshojmë pe as ne, kështu që ndoshta do të gjendemi diku në mes të rrugës”, shtoi Viktorija Trajkov – zëvendësministre për Çështje Europiane.
Euroambasadori Mihalis Rokas siguron se të gjithë punojnë me zell që vendi të zhbllokohet në rrugën drejt BE-së por nuk i komentoi idetë e ofruara në detaje.
“Ka aktivitete të mëdha diplomatike dhe një numër të madh vizitash dhe takimesh, kështu që çdo ide e mirë që do të rrjedhë nga vizitat dhe takimet e tilla është e mirëseardhur për ne”, u shpreh Mihalis Rokas – Euroambasador.
Për takim mes dy palëve foli edhe kryetari i Këshillit të BE gjatë vizitës në Shkup, Antonio Koshta. Kanë biseduar që ky takim të ndodhë gjatë Samitit të NATO-s në Hagë kah fundi i qershorit. Në takim do të merrnin pjesë edhe eurokomisarja Ursula von der Lajen dhe Kaja Kalas. Në mënyrë shtesë, janë ofruar edhe përfaqësues të NATO-s dhe SHBA-ve. Zv/ministrja Trajkov u përgjigj se sot do të ketë përgjigje nga pala bullgare në lidhje me ofertën për takim në Hagë, por nga kabineti i presidentes nuk ka konfirmim zyrtar.