“Shkodra Elektronike” performon sot në gjysmëfinalen e Eurovizionit, kënga “Zjerm” pritet të elektrizojë masën në Bazel të Zvicrës

Na ndajnë vetëm pak orë nga nata e parë e Festivalit Europian i Këngës që starton mbrëmjen e sotme (13 maj) në Bazel të Zvicrës, Eurovizion, ku në këtë gjysmëfinale, Shqipëria me Shkodrën Elektronike do të interpretojnë të dymbëdhjetët.

E ndërsa Beatriçe e Kola janë mbërthyer nga ethet e konkurrimit dhe emocionet që të përcjell skena magjike e Eurovizion, kryeministri Edi Rama u ka uruar suksese në këtë rrugëtim dy artistëve.

“MIRËMËNGJES dhe duke i uruar suksese Shqipërisë sonte në Eurovision, me Beatriçen dhe Kolën nga Shkodra Elektronike, ju uroj një ditë të mbarë”, shkruan Rama në rrjetin social Facebook, ndërsa ka publikuar edhe këngën “Zjerm”.

Në Festivalin e 63-të të Këngës në RTSH, “Zjerm” fitoi mbështetjen e jurisë profesioniste, publikut vendas dhe diasporës për të përfaqësuar Shqipërinë në Eurovizion.

Shkodra Elektronike do të interpretojnë të dymbëdhjetët në gjysmëfinalen e parë, që mbahet në Bazel të Zvicrës këtë 13 maj.

 “Zjerm” e Shkodrës Elektronike vjen në arenën e Eurovizionit si një gërshetim i traditës shqiptare me muzikën elektronike.

“Zjerm” është kënga që Shkodra Elektronike e krijoi që t’u përkasë të gjithëve, ndaj shqiptarët kudo ku jetojnë jashtë Shqipërisë duhet ta votojnë që ajo të marrë vendin që meriton në këtë Eurovizion.