Shënohet viktima e parë nga zjarret në Shqipëri

Në Shqipëri është shënuar viktima e parë nga zjarret. Një person ka humbur jetën në fshatin “Asim Zenel” në Gjirokastër, ndërsa një tjetër ndodhet në spital.

Bëhet fjalë për një çift bashkëshortësh të cilët u përpoqën të shuanin flakët e zjarrit që përfshinë banesën e tyre. Kryefamiljari ka humbur jetën ndërsa bashkëshortja e tij është dërguar për ndihmë mjeksore.

Rreth orës 16:30, ministri i Mbrojtjes, Niko Peleshi u ka kërkuar banorëve të zonës së njësisë Lunxhëri-Antigone që të evakuohen për shkak të rrezikut nga zjarri.about:blank

Peleshi thotë se bëhet fjalë për një “vatër zjarri të rrezikshme dhe “si pasojë e erës situata është agravuar dhe zjarri është shumë pranë banesave”.

Në mbështetje të strukturave të Mbrojtjes Civile kanë shkuar Forcat e Armatosura.

“U bëjmë thirrje banorëve të jenë bashkëpunues me strukturat shtetërore për të zbatuar urdhrin e evakuimit”, deklaroi ministri i Mbrojtjes.

Situatë kritike paraqitet dhe në njësinë administrative Shllak në Qarkun e Shkodrës. Prej disa ditësh kjo zonë është nën pushtetin e flakëve dhe janë djegur qindra hektarë pyll dhe kullota.

Gjashtë punonjës të zjarrfikësve si dhe 15 punonjës të zonave të mbrojtura ndodhen në terren për të vendosur nën kontroll flakët të cilat po favorizohen nga era ndërkohë që raportohet se flakët tashmë po i afrohen zonave të banuara.

Gjithashtu situata e zjarrit paraqet rrezik edhe në Karabur ku qeveria ka vendosur të shtojë numrin e ushtarëve dhe helikopterëve për shuarjen e flakëve. Nga e marta do të jenë tre helikopterë që do të përpiqen të shuajnë flakët, teksa në terren do të angazhohen më tepër njerëz./ENA