Administratë më profesionale me riorganizimin dhe zvogëlimin e numrit të të punësuarve, paralajmëroi ministri i Shoqërisë Informatike dhe Administratës Jeton Shaqiri, i cili beson se sistemi i shpërblimit në këtë sektor duhet të rishikohet për të siguruar nivele më të qëndrueshme të pagave dhe për të promovuar mobilitetin.
Në llogaridhënien për 100 ditët e para të dikasterit që ai drejton pas zgjedhjes së Qeverisë së re, Shaqiri i prezentoi ndryshimet e vazhdueshme në ligjet për nëpunësit administrativ, punonjësit e sektorit publik dhe shërbimin e lartë udhëheqës, duke treguar se po bëhet harmonizimi i tyre.
Ai informoi se tashmë kanë filluar procedurat për zhvendosjen e punonjësve sipas Marrëveshjes Kornizë të Ohrit, duke theksuar se procesi i njohjes së fakulteteve të tyre është në një fazë të hershme dhe sistematizimi i tyre kërkon kohë.
“Ky është një proces i rëndësishëm dhe besoj se të gjithë do të sistemohen në një mënyrë të përshtatshme dhe se nuk do të ketë njeri që nuk do ta pranojë punën e ofruar. Është çështje individuale, mund të kemi dallime, mund të kemi heqje të kontratave për arsye të caktuara, gjithçka varet nga organet që vendosin për të”, tha Shaqiri, kur u pyet për mundësinë që punonjësit sipas Marrëveshjes së Ohrit të refuzojnë dy herë një pozitë në një nga institucionet.
MSHIA, theksoi Shaqiri, në periudhën e kaluar filloi konceptin e Shërbimit të lartë udhëheqës, i cili do të vendosë një procedurë për emërime në pozicione udhëheqëse, profesionalizimin e pozitave udhëheqëse – të ndara nga udhëheqja politike, me përgjegjësi politike.
Realizimi i suksesshëm i këtij qëllimi, theksoi Shaqiri, është thelbësor për arritjen e të gjitha qëllimeve të tjera të procesit të reformës së administratës publike, për atë se, paralajmëroi ai, pa një ngritje optimale organizative të organeve, reforma e përgjithshme e administratës do të jetë e vështirë të arrihet.