Kryeministrja e Serbisë, Ana Bërnabiq e mori vaksinën kundër Kovid-19, me çka edhe zyrtarisht në Serbi filloi vaksinimi kundër koronavirusit. Bërnabiq u bë njeriu i parë në Serbi që merr dozën e Pfizer. Ajo tha se ka ndjerë nevojën që të vaksinohet e para për të treguar se beson në vaksinën dhe në institucionet.
“Sot është dita për buzëqeshje. Më në fund pas 6 marsit të këtij viti, më duket sikur është dita e parë kur kemi arsye për të buzëqeshur, sepse sot është dita kur shënohet fillimi i fundit të pandemisë me koronavirusin, kuptohet në Serbi, dhe në gjithë Evropën e Botën”, tha Bërnabiq.
Serbia është i pari vend në rajon që ka filluar me vaksinimin e popullatës kundër koronavirusit, ndërsa e treta në Evropë pas Zvicrës dhe Britanisë së Madhe.
Zëvendësministri i shëndetësisë Ilir Hasani tregon se pse Serbia e para u furnizua me vaksina në rajon:
“Ka shumë faktorë në gjithë këtë situatë. Të themi vet qendra rajonale e Fajzerit është në Beograd përmes së cilës faktikisht furnizohen të gjitha shtetet fqinje”, tha Hasani.
Por kur vaksina do të arrijë në Maqedonia?
“Është e vështirë të thuhet për datë konkrete në këtë garë të cilën momentalisht është garë botërore për sigurimin e vaksinave. Ne i shfrytëzojmë të gjitha kapacitet diplomatike, personale dhe shtetërore janë në shërbim të sigurimit të vaksinave. Bëhet maksimumi që të mundet sa më shpejtë të sigurohet vaksinimi. Tash është luftë e të gjitha shteteve që të marrin një copë të kulaçit edhe atë sa më herët”, shtoi Hasani.
Një ditë pas Krishtlindjeve vaksinimi pritet të fillojë edhe në Greqi. Edhe kryeministri grek, Mitsotakis ka njoftuar se do të vaksinohet bashkë me gruan e tij live për mediat. Bullgaria planifikon që të nisë vaksinimin kundër koronavirusit të ri më 27 dhjetor. Kosova ka aplikuar për sigurimin e vaksinës kundër COVID-19, por në Ministrinë e Shëndetësisë ende nuk e dinë se kur do të arrijnë vaksinat e para. Edhe në Shqipëri parashihet që vaksinimi të fillojë në tre mujorin e parë të vitit 2021.