Sela kërkon të miratohet ligj për kriminalizimin e mohimit të gjenocidit të Srebrenicës

Lideri i Aleancës për Shqiptarët, Ziadin Sela ka kujtuar viktimat e gjenocidit në Srebrenicë.

Ka vlerësuar, se janë dy momente që kanë bërë që viktimave të gjenocidit dy herë t’u mohohet drejtësia.

Kërkon, që të gjitha vendet evropiane të miratojnë ligje për kriminalizimin e mohimit të gjenocidit dhe të krijimit të një Dite Ndërkombëtare për përkujtimin e këtij gjenocidi.

“Drejtësia u është mohuar dy herë viktimave të gjenocidit të Srebrenicës.
Së pari, sepse për shkak të ndihmës që kryesit e gjenocidit morën nga struktura të caktuara shtetërore për t’u fshehur dhe për t’i ikur gjykatës ndërkombëtare, vendosja e drejtësisë u vonua për më tepër se një çerek shekulli.
Dhe së dyti, relativizmi i rrezikshëm dhe mohimi i gjenocidit që mbeten fenomene tepër të zakonshme në rajonin tonë, fyejnë memorien e viktimave dhe ofendojnë familjet e tyre, gjë që krijon terren pjellor për revizionizëm dhe retorikë politike të urrejtjes për dekada në vijim.
Është koha që të gjitha vendet evropiane të sjellin ligje për kriminalizimin e mohimit të gjenocidit dhe të dakordohen për krijimin e një Dite Ndërkombëtare të Përkujtimit të gjenocidit të Srebrenicës, për të mbrojtur të vërtetën historike, për të bërë drejtësinë për viktimat dhe për të parandaluar gjenocidet njëherë e përgjithmonë!”, shkroi Sela në “Facebook”, transmeton TV21.