Sela: Gjyqësori është kapur nga BDI

Aleanca për Shqiptarët deri në Kuvend do të dorëzoj ligj për veting në gjyqësor.

Kreu i kësaj partive Ziadin Sela tha se kjo është nevojë urgjente për të rikthyer besimin e qytetarëve në sistemin e drejtësisë. Sela tha se pa një ligji të tillë dhe me sistem gjyqësor të kapur ndërtohen shoqëri dhe sisteme totalitare.

“Mendoj që një proces i vetingut i mirëfilltë do ta bënte gjyqësorin më të besueshëm si një ndër vlerat kryesore të demokracive liberale. Patjetër duhet të gjejmë mekanizëm që qytetarët të mbrohen nga ana e atyre përfaqësuesve të cilët zgjidhen në zgjedhje dhe këtë e garanton vetëm rendi ligjor, këtë e garanton vetëm gjyqësia e pa politizuar dhe e pa korruptuar”, tha Sela.

Sela tha se pa marrë parasysh pasojat, vetingu duhet të zbatohet. Ftoi të gjitha partitë politike që mendojnë se drejtësia është kapur, të ulen dhe të përgatisin një ligj të përbashkët.

“Natyrisht që është thirrje publike për të gjithë aktorët politik të cilët mendojnë se duhet çkapur gjyqësori dhe nuk është që kemi pasur koordinim paraprak me këdo subjekt politik që është në opozitë, por kjo është thirrje publike për të gjithë aktorët politik, të gjithë ato të cilët janë të përfaqësuar në Kuvend që të ulemi dhe të bëjmë një ligj për veting”, shton ai.

Këto deklarata Sela i tha në konferencën për media në të cilën publikoi një hulumtim të ASh-së për kapjen e gjyqësorit nga funksionarët e Bashkimit Demokratik për Integrim. Propozuan themelimin e një task-force për reforma në gjyqësor për të bërë vlerësim gjithëpërfshirës të shkaqeve të kapjes së gjyqësorit.