Rivotimi në fshatin Llërcë të Zhelinës shkaktoi ndryshim të numrave të mandateve në favor të VLEN-it dhe në disfavor të Frontit Europian. Megjithatë, për Kreshnik Bekteshin nga Fronti Europian ky rivotim nuk ka sjellë ndonjë ndryshim esencial. I ftuar në Daily Click, thotë se pas rezultateve të 8 majit, ka patur inzhiniering zgjedhor në koordinim mes VMRO-së, LSDM-së dhe koalicionit VLEN.
“Nuk besoj se ka ndryshuar diçka esenciale, duke marrë parasysh që ka pasur tentim për inzhiniering zgjedhor duke u bërë bashkë VMRO-DPMNE, LSDM dhe koalicioni VLEN me mbivotim të anëtarit të BDI-së në kuadër të KSHZ-së. Tendenca ka qenë që t’i merren Frontit Europian dy deputetë dhe dy mandate, me të vetmin qëllim që Fronti Europian të mos jetë partia e dytë në nivel republikan”, tha Kreshnik Bekteshi – Fronti Europian.
Bekteshi akuzon se ka patur koordinim të plotë mes LSDM-së, VLEN-it dhe VMRO-DPMNE-së në zonën pesë që t’i heqin një deputet Frontit Europian dhe të njejtin t’ia japin LSDM-së.
“Ka pasur takim midis deputetit të liberalëve dhe deputetit të VMRO-DPMNE-së, njëkohësisht anëtar i kryesisë qendrore të VMRO-DPMNE-së, ku ka pasur dakordim që nëse kalon mandati tek LSDM-ja, ai deputet të trasnferohet në VMRO-DPMNE për ashtu të njohurën në opinion, 62 mandatet e z.Hristijan Mickoskit, me mbështetje të plotë të koalicionit VLEN, por kjo nuk ndodhi”, deklaroi Kreshnik Bekteshi – Fronti Europian.
Megjithatë Blerim Sejdiu nga koalicioni VLEN nuk pajtohet me këto konstatime dhe thotë se KSHZ dhe Gjykata Administrative i ka vërtetuar parregullsitë për të cilat janë ankuar.
E duke pritur që VLEN të përfundojë negociatat me VMRO-DPMNE-në për bashkëqeverisje, Sejdiu nuk zbulon se çfarë resoresh kanë dakorduar. Shprehet se me rëndësi do të jenë parimet programore dhe të arrijnë t’i realizojnë premtimet parazgjedhore. Sa i përket kuadrove se kush cilën ministri do të drejtojë, thotë se të gjitha propozimet duhet të kalojnë nëpër organet partiake dhe brenda kësaj jave do të kumtohet për opinionin.
“Unë mendoj se ka pjesa e kësaj jave disa njoftime pasi të miratohen këta edhe nga organet partiake. Sot kemi mbledhjen e Kuvendit qendror në parti. Të gjitha partitë koalicionuese kanë mbledhje. Është e vërtetë se janë përfolur shumë pozicione, që ndoshta edhe do të jenë ashtu, mirëpo përsëri duhet të jemi korrekt, duhet të kalojnë në organet partiake, thashë se sonte kemi mbledhje”, pohoi Blerim Sejdiun nga VLEN, Blerim Sejdiu – VLEN.
Sejdiu vërteton se sapo të formohet Qeveria, do të ketë një hapësirë kohore kur do t’i realizojnë ndryshimet kushtetuese.
“Do të konstituohet njëherë parlamenti. Do të verifikohet mandati i të gjithëve. Do të votohet edhe kryetari i Parlamentit. Edhe Qeveria do të formohet. Pastaj do të kemi një hapësirë kohore që ju nuk e keni bërë, nuk keni pasur mundësi ta bëni, nuk keni ditur si ta bëni. Ne do të arrijmë t’i bëjmë ndryshimet kushtetuese”, u shpreh Blerim Sejdiu – VLEN.
Ndryshimet kushtetuese sipas Sejdiut janë punë e kryer vetëm ka mbetur të diskutohet mënyra e realizimit, ndërsa pjesë e këtyre ndryshimeve paralajmëroi se mund të jetë edhe heqja e 20% sa i përket përdorimit të gjuhës shqipe.