Besimtarët mysliman dhe ortodoks festën e Bajramit dhe Pashkët do të mund t’i festojnë të lirë dhe pa shpejtuar që mos t’i kapi ora policore, sepse ministri i Shëndetësisë Venko Filipce dhe zëvendësi i tij Ilir Hasani deklaruan se gjatë këtyre dy festave nuk do të ketë orë policore.
“Gjatë Pashkëve dhe për festën e Bajramit të mos ketë aspak orë policore. Qytetarët do të mund lirshëm të lëvizin, por gjatë atyre ditëve kafenetë do të punojnë vetëm deri ora 20.30 e mbrëmjes”, tha Venko Filipçe – Ministër i Shëndetësisë.
Me heqjen e orës policore, besimtarët mysliman do të mund të falin edhe namazin e Bajramit në xhami.
“Festat fetare që po vijojnë duhet të jenë në frymën e respektimit të masave dhe i lus të gjithë qytetarët që të respektojnë masat, të mbajnë distancën, të mos grumbullohen”, theksoi Ilir Hasani – zëvendësministër i Shëndetësisë.
Komisioni për Sëmundje Ngjitëse ka propozuar edhe masa tjera lehtësuese pas 27 prillit.
Të hapen kafenetë, por të punojnë vetëm ne pjesën e hapur apo në veranda dhe të shkurtohet ora policore, pra e njëjta të fillojë prej ora 21 e mbrëmjes dhe të përfundojë në ora 5 e mëngjesit ka propozuar Komisioni për Sëmundje Ngjitëse deri tek Qeveria, e cila nesër duhet të sjell vendim mbi këto masa.
Lehtësimi i masave restriktive vjen, për shkak të vazhdimit të trendit të rënies së rasteve të reja pozitive me Covid-19 dhe të pacientëve të shtrirë në spitale. Propozimet do të hyjnë në fuqi, pasi të sjellë vendim edhe Qeveria.