Saraji në karantinë nëse vlerësojnë ekspertët

Erdhi në selinë e BDI-së në Çair për të shprehur shqetësimin për përhapjen e koronavirusit në Saraj.

Kryetari i kësaj komune Blerim Bexheti tha se numri i rasteve me Covid-19 ka arritur në 41, e numri më i madh i të infektuarve janë anëtarë të katër familjeve të Sarajit.

“Informatat që kam thonë se e mira e këtyre numrave që nuk janë pak, është se rastet janë nëpër familje. Kjo domethënë se rastet rriten por e mira është se nuk janë të përhapura në shumë familje nga një person. Numrin më të madh të rasteve, apo gjysmën e të infektuarve e përbëjnë 3-4 familje, ku janë thuajse të gjithë të infektuar”, deklaroi Blerim Bexheti – kryetar i Sarajit.

Nëse ekspertët vlerësojnë se për shëndetin e qytetarëve, Saraji duhet të futet në karantinë, Bexheti thotë se e mbështet plotësisht këtë vendim. Njëherit ai kërkoi nga Ministria e Shëndetësisë që të rrisë numrin e testeve në Komunën e Sarajit edhe atë deri në 700 në ditë. Ndërkaq nga banorët kërkoi që të shmangin edhe vizitat familjare dhe t’i respektojnë masat.

“Kuptohet që do të pranojmë gjithçka që është e rëndësishme për shëndetin e gjithsecilit prej nesh dhe në interes të përgjithshëm të të gjithë qytetarëve të Sarajit dhe të Shkupit”, Blerim Bexheti – kryetar i Sarajit.

Përndryshe 24 orët e fundit në vendin tonë janë regjistruar 35 raste të reja me virusin korona, ndërsa 5 persona kanë ndërruar jetë. Në raportin e sotëm të ISHP-së është regjistruar edhe foshnja nga Shkupi, e cila me kërkesë të prindërve të saj është transportuar me aeroplan për në Zvicër, ku edhe ndërroi jetë. Nga të infektuarit, 22 persona janë nga Shkupi, 6 nga Tetova, 4 nga Kumanova dhe nga 1 prej Gostivari, Struga dhe Shtipi.

Ministri i Shëndetësisë Venko Filipçe tha se nëse vazhdon ky trend i rritjes së rasteve me Covid-19 do të fusë në karantinë disa komuna si dhe do të rikthejë masat restriktive për qytetarët.

“Kam thënë dhe po e përsëris se po, do të marrim parasysh masa karantinimi për mbylljen e komunave ku ka rritje të rasteve. Nuk kemi vendosur për atë, por do t’i ndjekim numrat dhe situatën edhe ditëve në vazhdim dhe nga fillimi i javës së ardhshme do të sjellim vendime”, deklaroi Filipçe.

Numri i përgjithshëm i rasteve të diagnostikuar në vendin tonë që nga fillimi i epidemisë është 2164, numri i pacientëve të shëruar është 1535, numri i të vdekurve 131, dhe aktualisht numri i rasteve aktive në vend është 498.