Samiti i dhjetorit po afron/ Pendarovski pesimist, Osmani do të luftojë deri në fund

Presidenti Stevo Pendarovski nuk pret vendim pozitiv nga samiti i liderëve të Bashkimit Europian për vendet e Ballkanit perëndimor, që do të mbahet në dhjetor. Sipas tij, Maqedonia nuk e ka përmbushur parakushtin e vetëm nga korniza negociuese, andaj, sipas tij, rezultati është i qartë. Për këtë e fajëson opozitën dhe qëndrimet e tyre të palëkundura.
“Rezultati nga Samiti i dhjetorit është i qartë se çfarë do të jetë. Duke patur parasysh se parakushtin e kemi në kornizën negociuese, nuk mund ta përmbushim, është e qartë. Këtë po e flas tanimë një vit e gjysmë. Realitetet politike ishin të tilla në shtet. Ndërkohë përshkak qëndrimit të fortë të opozitës, për fat të keq asgjë nuk u ndryshua në atë drejtim dhe është e qartë se në samitin e dhjetorit nuk mund të ketë vendim pozitiv për ne.”- deklaroi Stevo Pendarovski – president i RMV-së.

Mirëpo ministri i jashtëm Bujar Osmani ende është optimist se mund të arrihet diçka dhe zotohet se do të punojë deri në fund. Paralajmëroi se nëse shteti dështon edhe këtë herë, ai në fund do t’i publikojë me emër e mbiemër të gjithë ata që kanë taktizuar me këtë shans historik.
“Historia do t’i ndëshkojë ata njerëz të cilët e lëshuan dhe taktizuan me këtë shans historik para të cilit ndodhemi. Ne do të luftojmë deri në fund që të arrijmë të hapërojmë. Nuk mund të them nga tani nëse ky proces nuk do të ketë sukses. Një muaj e gjysmë në politikë është periudhë e gjatë ku mund të bëhen punë të mëdha mirëpo në fund siç thash, me emër e mbiemër do t’i them ata që taktizuan këtë shans historik dhe do të jenë arsye për të gjitha pasojat nga ky shans i lëshuar.”- tha Bujar Osmani – Ministër I Jashtëm.

Parakushti i vetëm nga korniza negociuese është kërkesa e Bullgarisë që populli bullgar të përfshihet në Kushtetutën e Maqedonisë së Veriut. Mirëpo deri tani, këtë fuqishëm e ka kundërshtuar opozitarja VMRO-DPMNE, duke e quajtur si ndryshim i kushtetutës nën “diktat bullgar”.