“Mirë se erdhe” për Suedinë, mbështetje nga të gjithë për Ukrainën. Këto janë porositë që u dërguan nga dita e parë e Samitit të NATO-së që po mbahet në Vilinus, qytet i cili për herë të parë në histori i solli mbi 40 liderë shtetesh kaq afër Rusisë. Stoltenberg theksoi se aleatët do të sjellin vendime për përforcimin e parandalimit dhe mbrojtjes dhe do të dakordohen për premtime më ambicioze për investime në mbrojtje.
“Ky samit është samit historik për shkak se tashmë kemi bërë marrëveshje e cila garanton se Suedia do të bëhet anëtare e plotfuqishme e Aleancës. Dhe kjo është mirë për Suedinë. Është mirë për Turqinë, është mirë për gjithë NATO-në, dhe jo më pak e rëndësishme, është mirë për rajonin baltik, për Lituaninë dhe shtetet tjera nga ky rajon. Unë propozova pako me tre elemente me mbështetje më praktike, me program më shumë vjeçare për sigurimin e ndërveprueshmërisë mes forcave ukrainase dhe atyre të NATO-së. Kjo do ta afrojë Ukrainën afër NATO-së.”- deklaroi Jens Stoltenberg, Sekretar i Përgjithshëm i NATO-s.
Presidenti i Ukrainës, Volodimir Zelenski, sot arriti në Vilnius për herë të parë nga fillimi i luftës në Ukrainë. Me avion shtetëror polak arriti në qytetin i cili është shndërruar në fortesë. I mbyllur për trafik ajror, me mbi 12 mijë pjesëtarë të ushtrisë, policisë dhe shërbimeve sekrete. Qyteti ndodhet vetëm 35 kilometra nga Bjellorusia. Edhe një vendim i rëndësishëm do të sillet në këtë samit, që është 2% e BPV-së detyrimisht të shkojnë për mbrojtje. Sa është e gatshme për këtë gjë vendi ynë, biseduam me shefin e diplomacisë Bujar Osmanin.
“Jemi shumë afër dhe qëllimi ynë është që deri në vitin 2024 të jetë 2% e BPV dhe kuptohet edhe për ne është e pranueshme 2% që të jetë bazë fillestare për gatishmëri ushtarake të shtetit, dhe kuptohet që përqindja edhe mbi 30% për investime dhe modernizim të armatës. Mendoj se këto vite ishin të suksesshme, tre vjet të integrimit të shpejtë dhe në kapacitetet ushtarake megjithatë edhe në kapacitetet politike dhe vlerat e NATO-së.”- tha Bujar Osmani, ministër i Punëve të Jashtme.
“2% i BPV-së të jetë minimumi për financimin e mbrojtjes. Më së paku 20% nga ato të jenë për modernizim. Maqedonia e Veriut është vend i cili është për modernizim, tashmë investon 30% të buxhetit për mbrojtje, që natyrisht është e nevojshme në këtë kontekst.”- deklaroi Dimitar Kovaçevski, Kryeministër i RMV.
Pasdite në margjina të samitit u realizua edhe takim mes kryeministrit të vendit dhe kolegut të tij nga Bullgaria ku është biseduar për bashkëpunim ekonomik mes dy vendeve dhe ndryshimet kushtetuese që duhet të bëhen në vendin tonë për vendosjen e bullgarëve në Kushtetutë. Jovica Paunoski, TV21, Vilnius, Lituani.