Rusia mund të pranojë Bitcoinin nga disa vende, si pagesë për naftën dhe gazin, sipas një zyrtari të lartë rus, Pavel Zavalny.
Pavel Zavalny tha se vendet që nuk e kanë sanksionuar Rusinë, mund të lejohen të paguajnë me monedhat e tyre lokale.
Zavalny, i cili kryeson komitetin e Dumës Shtetërore të Rusisë për energjinë, përmendi Kinën dhe Turqinë si ndër vendet që “nuk ishin të përfshirë në presionin e sanksioneve”.
Në fillim të kësaj jave, presidenti rus Putin tha se dëshironte që vendet “jo miqësore” ta blejnë gazin rus me rubla.
Kjo lëvizje mendohet se synon të rrisë vlerën e monedhës ruse. Monedha ruse ka humbur mbi 20% të vlerës këtë vit, si pasojë e luftës.
Rusia është eksportuesi më i madh në botë i gazit natyror dhe furnizuesi i dytë më i madh i naftës.