Rruga e Shipkovicës në gjendje të mjerueshme – banorët thonë se është premtuar çdo cikël zgjedhor

TË FUNDIT

Ndonëse lidh tre fshatra si Brodecin, Bozovcën dhe Veshallën, rruga kryesore në fshatin Shipkovicë  është një gjendje të mjerueshme infrastrukturore. Gropa, pllaka bekatoni të shtruara dhe çimento, kështu duket kjo rrugë, të cilën janë munduar ta sanojnë disa herë vetë banorët. Edhe pse kjo rrugë është arteria kryesore për lëvizje për katër fshatra të malësisë, mijëra banorë që për çdo ditë duhet të vijnë në qytet, për furnizime me ushqim apo shërbime tjera, thonë se duhet të kalojnë nëpër këtë golgotë.

Fshatarët të revoltuar shtojnë se kjo rrugë premtohet në çdo cikël zgjedhor, por sapo kalojnë zgjedhjet ajo lihet në harresë.

 “Kur vijnë zgjedhjet thonë do e bëjmë dhe më pas s’e bëjnë. Veturat të gjitha na i dëmton edhe vetë e shihini si është rruga në hall është”, tha një banor i Shipkovicës.

“Na kanë premtuar se do të bëhet, deri sa është Ali Ahmeti dhe Zaevi nuk bëhet, në çdo veturë që kalon i shkon amortizimi, këta nuk janë normal, tash më edhe katër vjet tjera”, shtoi një banor tjetër.

“Në hall është rruga ma katastrofë nuk ka më, na dëmton veturat unë për vetë çdo vit duhet nga 1 mijë euro të jap ta rregulloj veturën”, u shpreh një tjetër banor.

Kjo rrugë është premtuar disa herë që të rikonstruohet, po e njëjta vazhdon të ngelet si një ndër rrugët më të dëmtuara. Gjatë ditës së sotme nga Shërbimi për informim i Komunës së Tetovës, nuk e panë të arsyeshme të përgjigjen në pyetjet tona. Se a ka komuna ndonjë projekt për këtë rrugë edhe nëse po a është i paraparë që të realizohet këtë vit.