Rritje e euroskepticizmit me lajme të rrejshme! Jashari: Janë fushata që burimin e kanë në Moskë

TË FUNDIT

Në mesin e fushatave me lajme të rrejshme, është edhe ajo që synon të rrisë skepticizmin e qytetarëve tek Bashkimi Evropian, tha Bardhyl Jashari nga “Metamorphosis” në emisionin “Click Plus”, ku u fol se si lajmet e rrejshme minojnë demokracinë.

 “Si rezultat i të gjitha këtyre fushatave të ndryshme nga aktorë që burimin e kanë në Moskë, tani përkrahja për BE-në në Maqedoni ka rënë diku 65% në 2019-tën dhe tash më duket është edhe më pak. Ajo që është e rëndësishme është se si pasojë direkte e këtyre fushata, të cilat përveç se japin lajme të rrejshme, narrativ kryesorë e kanë ta paraqesin perëndimin si një lloj sistemi të dobët, BE-në si sistem i cili nuk është unik, nuk sjellë mirëqenie për qytetarët dhe eurskepticizmi si pasojë e këtyre fushatave dezinformuese është 3% më i lartë”, tha Bardhyl Jashari, fondacioni “Metamorphosis”.

Edhe në Kosovë për shembull, moslibrealizimi i vizave, sipas Fitim Gashit nga Sbunker, shfrytëzohet për prodhim të lajmeve të rrejshme që rrisin euroskepticizmin tek qytetarët.

 “Është një proces që është stërzgjatur në raport me Kosovën dhe kohë pas kohe ndoshta kjo ka prodhuar edhe zhgënjim tek qytetarët në pritje të heqjes së vizave që kjo situatë të shfrytëzohet edhe nga ata të cilët prodhojnë lajme të tilla ku është munduar që të paraqitet, qoftë BE, qoftë shtetet anëtare veç e veç si refuzuese ose hezituese të cilat nuk duan ta pranojnë një shtet dhe mos është e ndërlidhur edhe për shkak që është shumicë myslimane apo ndoshta lidhjeve të tjera”, pohoi Fitim Gashi, Sbunker.

Një ndër mënyrat se mediat do të largoheshin nga “lufta” për klikime, e me këtë do të shmangeshin edhe dezinformatat, sipas komunikologut Faton Murseli, është edhe subvencionimi i mediave nga paratë publike.

 “Pavarësia financiare e mediave, sidomos private, është kruciale ndaj mospolitizimit dhe mospartizimit të tyre, por pasi që të gjithë ne jemi taksapagues të këtij shteti, besoj që, nuk e di a do të jetë i pranueshëm në mesin e gazetarëve, besoj që subvencionimet e ndryshme qeveritare mbi mediat, sidomos të reja, që janë burim i madh i lajmeve të rrejshme, do t’i largonte ata nga lufta e përditshme që bëjnë për klikime ose për të fituar”, tha Faton Murseli, komunikolog.

Në debat po ashtu u theksua edhe se partitë politike janë burim i rëndësishëm i lajmeve të rrejshme sepse nxjerrjen “fake news-e” që janë në interes të subjekteve të tyre, ndërsa burim tjetër i informatave të rreme vijnë nga jashtë shtetit e që u shërbejnë axhendave të ndryshe siç është minimi i demokracisë, duke krijuar kaos dhe frikë, ndërsa këtë e bëjnë përmes aktorëve në shtet, që mund të jenë politikanë ose ndikues të ndryshëm të cilët përmes rrjeteve online i shpërndajnë lajmet e rrejshme.