Rritet tatimi për “produktet luksoze” / Bytyqi: Nëse ka nevojë do të rishqyrtohet vendimi për disa produkte

Qytetarët përsëri do të përballen me rritje të çmimeve nëpër markete, pas sjelljes së ligjit për TVSh më të lartë. Marketet tanimë e kanë marrë listën e produkteve dhe po i përgatisin çmimet e reja. Me 10% më tepër do të tatohen lloje të caktuara të miellit, akullores, xhigerit, peshku i ngrirë, brumërat e ngrirë, produkte të bylmetit sikurse djathi, kaçkavalli, zdenka e ajka. Në listën për të cilën Qeveria konsideron se janë produkte luksoze, përfshihen edhe ajvari djegës, feferonat, panxhari, majonezi, ushqimi i konservuar si dhe ushqime për fëmijë si çokokremi, grizi, bonbonet dhe çipsat. Me çmime më të larta do të shiten gjithashtu edhe çajet, frutat tropikale, frutat e thata, fara luledielli, instant kafetë, piperi i zi, napolitankat, kompostot, çamçakëzët dhe pjesa më e madhe e erëzave. Paqartësi në opinion ka në atë se pse Qeveria i konsideron si luksoze disa produkte bazë sikurse djathi, mielli, ajvari, grizi e të tjera. Për këtë, zëvendëskryeministri për çështje ekonomike Fatmir Bytyqi, tha se nëse ka nevojë do të bëhet rishqyrtimi i çmimeve për produkte të caktuara.

“Nuk hyjmë në definimin e asaj se çfarë është luks dhe për kë është luks. Konsideroj se ky është një propozim që është ndarë me ministrinë. Mund të jetë lëshim në një moment. Mund të mos jetë lëshim. Unë them, çdo reagim nga qytetarët për produkte të caktuara sepse këtu flasim për dhjetë produkte. Ja i shoh reagimet nga dje deri sot, vetëm dhjetë nga dy mijë produkte që janë përfshirë me masën dhe për këtë them që për dhjetë produkte nuk ka asnjë problem të bëjmë ndryshim të vendimit”, tha Fatmir Bytyqi – Zv/kryeministër për Çështje Ekonomike.

Por ku qëndron problemi i definimit të tatimeve për produktet ushqimore? Sipas ekspertit për tatime, Pavle Gacov, Maqedonia ende bazohet në tarifat doganore të cilat për qytetarët janë të paqarta.

“Kontrolluam ne, bëmë analizë krahasuese, në vendet fqinje listat janë shumë më të qarta. Me përshkrim të saktë siç pritni t’i gjeni në markete. Për fat të keq Republika e Maqedonisë këtë e bën përmes modelit tarifor në tarifën doganore që është punë për ekspertë. Për qytetarët dhe ata që punojnë në markete, është e ndërlikuar. Është e qartë se disa punë u huqën dhe pres që shumë shpejtë, sepse vendimi nga sot hyn në fuqi të ndodhin ndryshime në vendim dhe është paralajmëruar se do të ndodhin. Me siguri të martën, të mërkurën do të publikohen ndryshimet për produkte të caktuara që konsiderohen si luksoze por nuk janë”, u shpreh Pavle Gacov, ekspert ekonomik për tatime.

Përndryshe, ky vendim u bë publik vetëm 2 javë pasi Qeveria vendosi që së paku për 10% të ulen çmimet e produkteve bazë si mielli, buka, mishi, pemët e perimet si dhe lëngjet. Shporta konsumuese për një familje katër anëtarëshe në gjashtë muajt e fundit ka lëvizur nga 48,000 denarë deri në pak më tepër se 50 mijë denarë. Gjatë kësaj periudhe, paga mesatare ka lëvizur rreth 36 mijë denarë. Indeksi për harxhimet e jetës në muajin gusht ka qenë 8,3%.