Një dasmë luksoze në Turqi është kthyer në kryefjalë të rrjeteve sociale, pasi nusja u shfaq e mbuluar me kilogramë flori, bizhuteri, valutë dhe kartëmonedha.
Bëhet fjalë për dasmën e Mehmet Fatih Tançalan, i njohur në rrjetet sociale si “Vanlı Kara Haydar”, dhe Çağla Öz, e zhvilluar më 6 shtator në qytetin e Vanit.
Në pamjet e publikuara në rrjetet sociale shihen sasi të mëdha bizhuterish dhe parash të vendosura si dhurata për çiftin. Vlera e florinjve të ekspozuar gjatë dasmës është raportuar në rreth 45 milionë lira turke.
Pas publikimit të pamjeve, autoritetet nisën një hetim financiar, ndërsa rasti iu përcoll edhe MASAK-ut, strukturës turke përgjegjëse për hetimin e transaksioneve financiare të dyshimta.
Sipas dokumenteve të hetimit, është vënë në pikëpyetje përputhja mes profilit financiar të Tançalanit dhe nivelit të luksit të shfaqur në rrjetet sociale dhe gjatë dasmës.
Tançalan u arrestua dhe më pas u dërgua në gjykatë, e cila vendosi ta lërë në paraburgim nën akuzën për pastrim të pasurive që burojnë nga vepra penale. Ndaj tij kishte nisur gjithashtu një hetim lidhur me disa postime në rrjetet sociale.
Në dëshminë e tij, Tançalan i ka mohuar akuzat, duke pretenduar se florinjtë e vendosur në dasmë nuk ishin të tij. Sipas tij, bizhuteritë ishin marrë hua nga një argjendari dhe i ishin kthyer pas ceremonisë, ndërsa shpenzimet e dasmës ishin mbuluar nga sponsorë.
Hetimet për origjinën e florinjve, parave dhe pasurisë së çiftit vijojnë.