Rrënimi i objektit ilegal te QT “Mavrovasja”, Çairi e hapi tenderin, as Prokuroria s’e njeh realizuesin

Komuna e Çairit e ka hapur tenderin për përzgjedhjen e ndërmarrjes për rrënim të objektit ilegal te Qendra Tregtare “Mavrovasja”. Tenderi hapet për “Aktivitete punuese për rrënimin e objekteve të ndërtuara pa leje” dhe vlera e tij kap shumën prej 1 milioë e 180 mijë denarë me TVSH.

Tenderi nuk është vetëm për rrënimin e objektit te “Mavrovasja” por edhe për nevojat tjera të komunës, sqaroi kryetari i Komunës së Çairit, Visar Ganiu.

“Jo, tenderin nuk e prishim për shkak se neve na duhet gjatë tërë vitit sepse ka edhe pjesë tjera që ndërtohen pa leje dhe me atë tender do të kemi mundësi të veprojmë. Kuptohet, ne edhe kur e shpallim tenderin nuk e shpallim me dedikim për këtë objekt, por e shpallim në përgjithësi që të mund të veprojmë edhe në situata të tjera”, tha kryetari i Komunsë së Çairit, Visar Ganiu.

Kjo i jep mundësi komunës, që në rast se realizuesi i ndërtimit ilegal vendos ta rrënojë objektin pa leje me vetëdëshirë dhe brenda afatit të parapraë prej 8 ditësh, komuna nuk do të ketë nevojë ta anulojë tenderin që u hap sot.

Punime as sot nuk realizoheshin, por pronari i objektit ilegal edhe më tej i panjohur për autoritetet.

“Nga ana e SPB Shkup ende po punohet për të siguruar të gjitha dëshmitë e shkruara dhe po ndërmerren aktivitetet për verifikim të identitetit të kryerësit të vepresë penale. Gjatë procedurës parahetimore, gjatë ndërmarrjes së aktiviteteve nga ana e policisë, Prokuroria do t’i japë të gjitha urdhërat dhe kërkesat e nevojshme që të sigurohen dëshmitë dhe për vërtetim të identitetit të kryerësit të veprës penale”, thonë nga Prokuroria Publike.

Ndërkaq Ganiu deklaroi se për situatën, realizuesin e punimeve është munduar ta kontaktojë edhe në rrugë jozyrtare.

“Kam tentuar në rrugë jozyrtare ta kërkoj, personin që të vjen, por nuk ka ardhur. Por, unë jam i bindur se edhe për të mirën e atij, edhe për të mirën e vetë komunës për shkak se është një ndërtim pa leje, rrënimin ta bën vetë”, u shpreh Visar Ganiu, kryetar i Komunës së Çairit.

Prej të premten ka filluar edhe afati 8 ditor i cili shfrytëzohet nga Komuna e Çairit për ta informuar pronarin se objekti duhet të rrënohet. Ka 5 ditë që punimet janë ndërprerë edhe pse gjatë periudhës paraprake ato ishin intensive. Se punimet në vendin ku më parë ishte kafeneja “Fontana” janë ilegale, kishte vërtetuar gjatë inspektimit që ishte bërë më 10 korrik. Por kur inspektorët kanë shkuar në terren, nuk e kanë takuar realizuesin e punimeve dhe për këtë komuna atë e informon nëpërmjet Gazetës Zyrtare.