Rregullativat e bankave, problem për qytetarët? Në tregun maqedonas ka vend për shoqatat financiare

Qasja e qytetarëve për marrje të kredive prej bankave është vështirësuar. Arsyeja qëndron te rregullativat e bankave dhe mungesa e interesit të bankave për të dhënë kredi të vogla, sqaron për TV21 ish- ministri i financave Trajko Sllaveski. Nga ana tjetër, ai shtoi se vetë institucionet financiare nuk u japin kredi personave që kanë borxhe të mëdha. Kjo, sipas tij lë hapësirë në tregun e Maqedonisë për veprim të shoqatave financiare. Në pjesën e politikave aktuale ekonomike, ish -ministri i financave me vërejtje për masat e shumta populiste.

 “Disa prej masave siç ishte ajo për përkrahje të rrogave në sektorët e goditur, janë të mira për ruajtën e vendeve të punës, por disa të tjera janë populiste, që do të thotë hedhje parash, madje para të huazuara. Para që nuk i kemi. E di se ministër i mirë i financave është ai i cili mund t’i thotë JO kryeministrit”, tha Trajko Sllaveski – ish-Ministër i Financave.

Ai pranon se ministri aktual e kryen mirë punën e tij. Për Besimin, si student i tij i shkëlqyeshëm, Sllaveski në emisionin “21 Minuta”, tha se është futur në zjarr duke u ballafaquar me krizë të mëdhe. Rreth iniciativës së Bytyqit për krijim të një trupi këshillëdhënës, ku ishin përmendur edhe disa emra që ishin pjesë e Qeverisë së Gruevskit, Sllaveski deklaroi se çdokush ka të drejtë të pranojë ose të refuzojë pjesëmarrje.

“Nëse vëreni tashmë një muaj e gjysmë ne nuk kemi dëgjuar gjë për këtë iniciativë. Unë kam frikë se edhe Bytyqi pas asaj që ndodhi, pas kritikave që erdhën jo nga opozita, por nga partia e tij, është dekurajuar që të shkojë me ritmin që e ka paraparë. Unë nuk kam informacion se kjo iniciativë do të kthehet”, u shpreh ish-ministri i Financave, Trajko Sllaveski.

Në po të njëjtën temë edhe zëvendëskryeministri për çështje ekonomike, Fatmir Bytyqi, komentoi se nuk duhet të jetë mëkat nëse bisedon me njerëzit që nuk e ndajnë mendimin e tij.

“Një nga virtytet e njerëzve është të bisedojë me të gjithë. Lista do të jetë edhe më e madhe.  Nuk ka asgjë të keqe nëse pyetet dikush që të japë mendimin e tij”, deklaroi Fatmir Bytyqi – zëvendëskryeministër për Çështje Ekonomike.

Nëse ky është mëkati më i madh që e kam bërë, atëherë kërkoj ndjesë, tha Bytyqi.