Rezervuari i Grushinës është në tokë private! Komuna e Haraçinës: Nuk mundëm të ndërhyjmë

Gjatë ditës së djeshme për banorët e fshatit Grushinë që po e rinovojnë me vetiniciativë rezervuarin e ujit kemi pyetur edhe Komunën e Haraçinës.

Nga kjo komunë në formë elektronike na kthyen përgjigje se inciativë për rinovimin e këtij rezervuari ka pasur edhe nga vetë komuna por vendi ku duhej të ndërtohej është pronë private dhe nuk kanë mundur të intervenojnë.

 “Çështja e ujit ne Grushine, lidhet me rezervuarin e ujit dhe jo me sistemin e përgjithshëm. Ne kemi ndërmarrë iniciative, bile kanë qenë prezent edhe qytetarë të këtij fshati në iniciativat tona, me idenë për te zhvilluar projektin adekuat për meremetimin e rezervuarit të ujit ne këtë fshat. Nga iniciativa komunale e ndërmarrë, zbuluam se rezervuari ndodhet ne tokë private dhe si e tille, na ka limituar në veprim”, thonë nga Komuna e Haraçinës.

Më tej nga kjo komunë thanë se fshati nuk ka mbetur i harruar dhe se që nga fillimi i mandatit të Milikije Halimit kanë shtruar rrugë prej 1 km dhe kanë investuar në shkollën e fshatit.

 “Gjate periudhës sonë, në Grushinë, Komuna e Haraçinës ka investuar në disa projekte, si rregullimi i rrugës në drejtim te fshatit (me gjatësi 1 km), investime ne shkollën e Grushinës, në krijimin e sistemit qendror te nxehjes, etj. Kemi vëmendjen e veçantë jo vetëm ndaj këtij fshati, por ndaj të gjitha fshatrave që janë pjese e komunës sonë”, theksojnë nga Komuna e Haraçinës.

Banorët e fshatit të Grushinës kanë mbledhur të holla për ta rregulluar rezervuarin e ujit që datonte prej kohës së KFORIT dhe se ka pasur afat të përdorimit vetëm 10 vjet.  Ndërsa për rregullimin e këtij rezervuari banorët kanë mbledhur 12.500 euro.