Regjistrimi i popullsisë në vitin 2011 është ndërprerë për të shmangur tensione ndëretnike, madje shumë kush e dëshironte destabilzimin e vendit. Kjo ka qenë njëra nga përgjigjet e liderit të BDI-së Ali Ahmeti, dje kur u mor në pyetje nga prokurorja Fatime Fetai, për rastin “Regjistrimi”. Ai këtë e bëri të ditur para gazetarëve, ndërsa tha se me shtyrjen e regjistrimit nuk është bërë vepër penale.
“Aso kohe ka qenë një moment shumë i vështirë, tepër i tensionuar deri edhe në përmasa në mes të etnive dhe janë bërë përpjekje si deputet si njerëz që kemi përgjegjësi që ai regjistrim të shtyhet me qëllimin më të mirë që të mos krijohen probleme në shtet, ashtu, ashtu shumë kush në atë periudhë ka qenë i interesuar që vendi ynë të destabilizohej. Për ta menaxhuar situatën kam vlerësuar dhe kemi vlerësuar të gjithë bashkërisht që ky regjistrim të spostohet”, u shpreh kryetari i BDI-së, Ali Ahmeti.
Ahmeti tha se i vjen keq që largimi i djeshëm nga prokuroria pa u përballur me mediat u cilësua si ikje nga pyetjet e gazetarëve, por tha se e vërteta është se ka pasur agjendë të ngjeshur
.
“Mua më vjen keq, por agjenda ime ka qenë e planifikuar, në orën 10 kam pasur takime krejtësisht tjera…01.03 Më vjen keq kështu që është bërë aq temë sepse nuk ka asnjë qëllim asnjë prapavijë në këtë drejtim po as edhe teori konspirative”, deklaroi Ali Ahmeti – Kryetar i BDI-së.
Në lëndën “Regjistrimi” i dyshuar përveç Ahmetit është edhe ish partneri i tij i koalicionit Nikolla Gruevski.
Sipas Prokurorisë me ndërprerjen e regjistrimit të popullsisë në 2011, Ahmeti e Gruevski i kanë shkaktuar dëm shtetit 2.8 milion euro. Që nga viti 2002 e deri më tani vendi jonë nuk ka pasur regjistrim të popullsisë.
Edhe regjistrimi i cili ishte planifikuar për në prill të këtij viti u anulua për shkak të zgjedhjeve të parakohshme parlamentare, kurse kryeministri Zoran Zaev tha se regjistrimi përfundimisht do të bëhet në prill të vitit 2021 dhe nga ky qëndrim nuk ka lëkundje.