Regjisori Michael Mann, i njohur për filmin kriminalistik “Heat”, është plagosur në një aksident në një poligon qitjeje në Los Angeles. Lajmin e ka konfirmuar zëdhënësja e tij për agjencinë e lajmeve DPA.
Portali “TMZ” raportoi i pari për incidentin, duke iu referuar burimeve policore. Sipas raportimit, ngjarja ka ndodhur të shtunën, kur Mann (83), i cili është një qitës rekreativ me përvojë, aksidentalisht ka qëlluar veten në këmbë, teksa po përpiqej ta vendoste pistoletën në këllëf.
Regjisori amerikan ka pësuar lëndime sipërfaqësore dhe aktualisht po merr trajtim mjekësor. Sipas zëdhënëses së tij, ai pritet të lirohet nga spitali së shpejti.
Michael Mann është i njohur për filmat e tij kriminalistikë, ku kanë luajtur disa nga yjet më të mëdhenj të Hollywood-it.
Ndër veprat e tij më të njohura është filmi “Heat” (1995), me Robert De Niron dhe Al Pacinon, si dhe “Collateral” (2004), ku Tom Cruise luan rolin e një vrasësi me pagesë në rrugët e Los Angelesit.
Mann ka drejtuar edhe adaptimin filmik të serialit televiziv “Miami Vice”, me Colin Farrell dhe Jamie Foxx në rolet e dy detektivëve që luftojnë krimin.