Nuk heqim dorë dhe do të vazhdojmë të protestojmë kundër shtrenjtimit të energjisë elektrike. Kështu kanë komentuar nga Konfederata e Sindikatave deklaratën e Zoran Zaevit i cili tha se nuk mendon se përbërja e re e Kuvendit duhet ta shpërbëjë Komisionin Rregullator për Energjetikë.
“Definitivisht, unë i pash të gjitha argumentet dhe sqarimin e Komisionit Rregullator për Energjetikë dhe mendoj se Kuvendi i Maqedonisë nuk duhet të marrë asnjë vendim për shkarkimin e tyre”, tha Zoran Zaev, kryetar i LSDM-së.
Marjan Risteski nga Konfederata e Sindikatave të cilët janë organizatorë të protestës kundër shtrenjtimit të energjisë elektrike në Shkup, kanë njoftuar se nesër vazhdojnë me protestat ku do të bllokojnë dy udhëkryqet, atë te Ministria e Drejtësisë dhe te qendra tregtare “Mavrovasja”.
“Ne nuk heqim dorë nga angazhimi ynë, nga protestat. Kemi pasur takim me trupin koordinator të protestës në tërë shtetin. Ne nesër veprojmë në Shkup, kemi disa aktivitete. Kumanovë ka paralajmërim, edhe në Tetovë. Ka paralajmërime edhe në Manastir dhe Prilep. Paraqiten njerëz dhe kjo po bëhet tashmë një lëvizje popullore”, theksoi Marjan Risteski nga Konfederata e Sindikatave.
Shpreson se Zaev do të ndryshojë mendje dhe Kuvendi i ardhshëm por edhe Qeveria do të gjejnë mënyra se si ta anulojnë vendimin për shtrenjtim të energjisë elektrike për 7.4 për qind.
“Ne e dëgjuam deklaratën e kryeministrit të ri-vjetër. Ne shpresojmë, se ai si kryeministër edhe më herët si sindikata, si organizata qytetare kur kemi vepruar janë treguar të mirë dhe janë tërhequr në disa raste, nga disa vendime që i kanë miratuar. Shpresojmë se do të gjejmë mirëkuptim. Ne presim që sa më shpejtë të formohet Kuvendi dhe Qeveria dhe të ulemi në një tryezë të përbashkët që t’i përballim argumentet”, potencoi Marjan Risteski.
Ka reaguar edhe organizatori i protestës në Tetovë, Arianit Xhaferi dhe pyet se kush i mbron qytetarët nga komisione të tilla të pavarura.
“E shoh se zotëri Zoran Zaev paska kërkuar nga deputetët e Kuvendit që mos ta shpërbëjnë Komisionin Rregullator për Energjetikë. Po pyes:
– Pse kryeministri bëhet avokat i Komisionit?
– Kujt duhet t’i shërbejnë deputetët, kryeministrit Zaev apo qytetarëve?
– Kush i mbron qytetarët nga Komisione të tilla “të pavarura”?„, deklaroi Arianit Xhaferi.
Kërkojnë që të ndryshohet mënyra se si sillen vendimet për shtrenjtim të energjisë elektrike nga Komisioni Rregullator për Energjitë. Procedura të përfshijë të gjithë palët e prekura, ekspertët dhe shoqatat dhe sindikatat.
Prandaj, vlerësojnë se protestat do t’i radikalizojnë deri sa nuk ka një vendim i cili nuk do të mbrojë vetëm interesin e ndërmarrjeve energjetike, por edhe të qytetarëve.
Ndërkaq për nesër, përveç në Shkup protesta do të realizohen edhe në Tetovë, Strugë, Kërçovë, Gostivar, Kumanovë, Prilep dhe Manastir.