Reagime ndaj Siljanovskës, MPJ: Të kenë kujdes funksionarët e zgjedhur shtetëror!

Betimi i presidentes së re të shtetit, Gordana Siljanovska Davkovës duke mos përmendur emrin e plotë kushtetues të vendit, bëri të reagojë edhe Ministrinë e Punëve të Jashtme të vendit. Nga atje thonë se dy vendet, pra Maqedonia e Veriut dhe Greqia për shtatë vite me radhë kanë zhvilluar nivel të lartë të dialogut politik dhe i bëjnë thirrje të gjithë aktorëve politik, që të ruajnë këtë kurs euroatlantik, duke respektuar emrin kushtetues të vendit.

“Gjatë shtatë viteve të fundit, dy vendet fqinje kanë zhvilluar një nivel jashtëzakonisht të lartë të dialogut politik, i cili ka rezultuar në një rritje të disafishtë të bashkëpunimit ekonomik dhe në ndërtimin e marrëdhënieve pozitive mes qytetarëve. Bëjmë thirrje për kujdes nga të gjithë aktorët politikë, veçanërisht funksionerët e zgjedhur shtetëror. Ruajtja e kursit euroatlantik të vendit është interes themelor strategjik dhe garantues i sigurisë dhe stabilitetit afatgjatë të vendit”, thonë nga MPJ.

I revoltuar reagoi edhe ministri i drejtësisë, Krenar Lloga. Thotë se mos respektimi I emrit të shtetit, e bënë betimin të pavlefshëm. Thërret të përsëritet procedura e betimit, ose me shtetin të kryesojë kryetari i Kuvendit, Jovan Mitrevski.

“Mos respektimi i emrit kushtetues të shtetit e bën betimin e Siljanovskës NUL (të pa vlefshëm). Ose përsëritje e procedurës ose Jovan Mitrevski (Kryetar i Kuvendit) duhet të marrë funksionin e Kryetarit të Shtetit si ushtrues detyre”, theksoi Krenar Lloga.

Lloga sot përsëri shpërndau një video nga betimi I pare I ish presidentit të SHBA-ve Barak Obama, I cili nuk e ka bërë betimin sipas planit dhe të nesërmen ka qenë I detyruar ta përsëritë betimin.

Nga Lëvizja Besa, pjesë e koalicionit VLEN, thonë se emri i ri i shtetit në fakt është pranuar nga Siljanovska sepse betimi në formë të shkruar ka qenë me shtesën “E Veriut” dhe e njejta është nënshkruar nga Siljanovska.

“Shprehim shqetësimin tonë për ndikimin e emocioneve të fushatës zgjedhore në racionalitetin e hapave të parë në realpolitikë. Ne nuk kemi nevojë për hapjen e plagëve të vjetra. Ndaj është mirë që presidentja e re nënshkroi betimin me emrin kushtetues, që është ende një shenjë se realiteti de facto pranohet prej saj”, thonë nga VLEN.

Mos theksimi i emrit të plotë të shtetit, Maqedonia e Veriut, bëri që të braktisë seancën në shenjë proteste ambasadorja e Greqisë në vendin tone, Sofia Filipidu. Pas kësaj dje reagoi edhe MPJ-ja greke. Sipas tyre, ky akt shkel në mënyrë të rëndë Marrëveshjen e Prespës si dhe Kushtetutën e shtetit fqinj, e cila është në përputhje me detyrimet e tij nëdrkombëtare. Nga atje thonë se për të vazhduar marrëdhëniet mes dy palëve, duhet të respektohet në mënyrë të plotë Marrëveshja e Prespës.