Raporti i Eurothink mbi shërbimet e intelegjencës! “Mbikëqyrja parlamentare e shërbimeve, e politizuar”

Komisionet parlamentare që mbikëqyrin punën e shërbimeve të inteligjencës politizohen, deputetet shpesh mbajnë anën e partive të tyre dhe jo të asaj që realisht është e dobishme, thotë raporti i Qendrës për Strategji Evropiane. Problem, sipas “Eurothink”, paraqet fakti që aktualisht Agjencia për Siguri Kombëtare, Agjencia Teknike Operative dhe Agjencia për zbulim mbikëqyren nga tre komisione të ndryshme parlamentare, me shumë anëtarë dhe me profile joadekuate profesionale.

 “Gjetjet tona thonë se mbikëqyrja mbi shërbimet e inteligjencës është e politizuar dhe në masë të madhe disa anëtarë të caktuar të komisioneve më shumë marrin anë nga qëndrimet e partive të tyre. Megjithatë dua të theksoj se periudha e cila është e përfshirë në analizë bëhet fjalë për përbërjen parlamentare 2016-2020, mbetet të shohim punën e kësaj shumicë parlamentare dhe pastaj të analizohet edhe puna e tyre”, tha Ivan Stefaovski – “Eurothink”.

Deputetët që janë pjesë përbërëse të këtyre komisioneve thonë se njëherë duhet të shohin se si funksionin tani kjo mënyrë e mbikëqyrjes së shërbimeve, e nëse paraqitet nevoja për ndryshim ata janë të gatshëm për një gjë të tillë.

“Absolutisht, si Kuvend, si shumicë parlamentare,  besoj se edhe kolegët nga opozita do të pajtohen se jemi të hapur për çfarëdo ndryshime që do të thonë përmirësim të mbikëqyrjes. Reforma vetvetiu nuk është e mjaftueshme nëse nuk e zbatojmë tërësisht, ndërsa mbikëqyrja në këtë rast me reformat në shërbimet e sigurisë dhe zbulimit  luan rol shumë të rëndësishëm”, theksoi Sllavjanka Petrovska – deputete e LSDM-së.

 “Australia ka sistem të tillë të koncentrimit të të gjithë komisioneve në një,  mendoj se kështu është edhe në Bullgari dhe në disa vende të BE-së. Nuk ka mënyrë të unifikuar të kontrollit mbi shërbimet, çdo shtet në bazë të nevojave të tyre dhe interesave dhe nivelit të demokracisë e rregullon se cili është modeli më e mirë për kontroll mbi shërbimet”, potencoi Lupço Prenxhov – deputet i GROM.

Komisionet për mbikëqyrje të shërbimeve janë nga fundi i kompletimit të ekipeve dhe eksperteve dhe në afat të shpejtë do të vizitojnë këto tre agjenci për të parë nëse zbatohen dhe respektohen reformat për ndjekje të komunikimeve. Reformat në këtë fushë vijnë si pasojë e përgjimeve masive që ishin bërë  gjatë periudhës së viteve 2008-2015 kur në mënyrë të jashtëligjshme ishin ndjekur 4.286 numra të telefonit për të cilët nuk ka pasur urdhër nga gjykata, kurse 1.541 numra tjerë janë përgjuar edhe pas përfundimit të afatit të urdhëresave gjyqësore. Janë përgjuar mbi 20.000 qytetarë.