Qeveria premton linja të reja hekurudhore/ Ndërsa ato që kemi rrezikojnë të ndërpriten

Qeveria vazhdimisht premton linja të reja hekurudhore, derisa ato që kemi kanë filluar të ndërpriten.
Edhe pse linja Shkup – Tabanoc figuron ende në monitorin e stacionit të hekurudhave në Shkup, në fakt kjo linjë është ndërprerë që nga 4 janari i këtij viti, ndërkaq nga hekurudhat e Maqedonisë së Veriut thonë se pritet të ketë ndërprerje edhe të linjave të tjera.
Arsyeja e ndërprerjeve të linjave është mungesa e makinistëve, thonë nga “Hekurudhat e Maqedonisë”.

“Ne i jemi drejtuar Qeverisë, është e njoftuar me këtë problem dhe kemi vendim të Qeverisë me çka na lejon që të punësojmë 40 makinistë të rinj për të cilët momentalisht jemi duke pritur pajtim edhe nga Ministria e Financave. Në rast se e marrim këtë pajtim, bëhet shpallje dhe lajmërohen.. kemi numër të madh të të interesuarve, pastaj vazhdojmë me procedurat tjera për trajnimin e tyre .”- deklaroi Lubiçica Cvetkoviç – Udhëheqëse e Sektorit për Marrëdhënie me Publikun.
Cvetkoviç shton se mosha e shumicës së të punësuarve është në prag të pensionimit prandaj ekziston rreziku për ndërprerjen e linjave të tjera hekurudhore, në rast se nuk punësohen makinistë të rinj.
Për këtë çështje TV21 pyeti edhe Ministrin e Financave për atë se kur do të jepet pajtimi për punësimet e reja.
“Në lidhje me pyetjen tuaj Ju informojmë se kjo çështje do të trajtohet pasi në seancë të Qeverisë së Republikës së Maqedonisë të shqyrtohet Plani financiar për vitin 2023 i Hekurudhave të Maqedonisë – Transport për vitin 2023.”- u përgjigjën nga Ministria e Financave.
Ndërsa shtojnë se Ministria e Financave, në përputhje me dispozitat ligjore vetëm njofton përdoruesit buxhetorë se në kuadër të buxheteve apo planeve financiare për vitin aktual fiskal a kanë siguruar mjete financiare për realizimin e punësimeve të reja.