Qeveria kërkon heqjen e Portës “Maqedonia”, njëjtë pritet të hiqet edhe monumenti për Nënë Terezën dhe anijet në Vardar

“Kjo është Porta “Maqedonia” në qendër të Shkupit. U ndërtua në kuadër të projektit “Shkupi 2014”, ndërsa u përurua në janar të 2012-tës. Tani, Qeveria “Zaev 2” po kërkon që e njëjta të hiqet”, Besir Arifi, gazetar.

Qeveria me shkresë deri tek Komuna Qendër që nga plani i hapësirave për ndërtim të fshihet pulla për Portën.
Përveç kësaj, në plan për t’u rrënuar është edhe monumenti i Nënë Terezës në shesh, ndërtimi i të cilit tashmë ka vite që ka ndaluar.
Tani pritet që te Komuna Qendër dhe Ministria e Kulturës të vendosin për hapat e mëtejshëm.

“Thjesht do të bëhet rrënimi ose demolimi i objekteve që ju përmendni. Do të duhet të bëhet një koordinim serioz mes Komunës Qendër, Qeverisë dhe Ministrisë së Kulturës sepse bëhet fjalë për objekte që janë nën juridiksionin e tyre”, tha Petre Shilegov – Kryetar i Qytetit të Shkupit.

I pari i kryeqytetit nuk pret që heqja e këtyre dy monumenteve të jetë aq e vështirë sa është procedura për largimin e anijeve nga Vardari, të cilat janë edhe objekte biznesi.
Qyteti i Shkupit ka arritur që pa pasur implikime buxhetore t’i kryejë procedurat për largimin e 2 nga 3 anijet. Pritet që të vazhdohet me procedurat edhe për heqjen e së tretës.

“Do të vazhdojmë, dhe që ta dini ju dhe opinioni, për një prej anijeve tashmë është hedhur poshtë ankimimi nga Gjykata e Apelit. Janë dy ankesa. Njëra është refuzuar aq sa jam i informuar nga përmbaruesi. Pres që edhe tjetri të hidhet poshtë gjatë javës së ardhshme dhe shumë shpejt do të fillojmë me dislokimin e anijes së parë”, deklaroi Petre Shilegov – Kryetar i Qytetit të Shkupit.

Pyetëm qytetarët konkretisht se ç’mendojnë për heqjen e Portës “Maqedonia”.

TV21: Çfarë mendoni për këtë hap të Qeverisë?
Qytetar: “Nuk duhet të prishet, ajo që është bërë, është bërë! Nëse mendojnë të bëjnë diçka tjetër, të re, le të bëjnë…”
Qytetar: “Ne asnjë lloj fitoreje nuk kemi pasur deri më tani, apo presim që dikush të fitoje e të…të kalojmë. Por le të qëndrojë, çfarë të bëjmë?! Do të vijë tjetri prap do të japë para…”

“Pasi të hiqet Porta “Maqedonia” një çështje e hapur që ngelet është se ku do të rivendoset numratori, të cilin Kryeministri Zoran Zaev e pagoi me paratë e veta, e që do të tregonte paratë e kthyera të qytetarëve, por asnjëherë nuk u ndez…”, Besir Arifi, gazetar.