Qeveria do të sjellë ligj të ri! Kompanitë paguajnë gjobë dhe vazhdojnë me praktikat e pandershme tregtare

TË FUNDIT

Pandemia e virusit korona dhe lufta në Ukrainë janë shkaqet kryesore për rritjen e inflacionit dhe goditjen e çmimeve, që preku të gjithë qytetarët. Qeveria fillon “betejë” me tregtarët që duan të përfitojnë në kurriz të qytetarëve.

“Nëse unë për shembull shkoj me një marzhë fitimi prej 80%…. deri atje shkojnë kompanitë që do të paguanin gjobë prej 5.000 eurove, kurse në kurriz të qytetarëve dhe konsumatorëve këtë gjobë mund ta paguajnë brenda 3-4 orëve pune në ditë. Tani do të kemi sanksione shtesë, ku përveç gjobave financiare, do të ketë edhe mbyllje të kompanive të caktuara. Do t’i bëjmë publike kompanitë që e bëjnë këtë, e pse të mos ketë edhe ndalesë për kryerjen e veprimtarisë”, deklaroi Kreshnik Bekteshi, ministër i Ekonomisë.

Të martën në seancën e Qeverisë do të miratohet projektligj për mbrojtjen e konsumatorëve, ku gjobat do të jenë shumë më të larta për të gjitha praktikat e pandershme që bëhen në dëm të konsumatorëve.

“Imagjinoni, te vaji gatimi, nëse kushton 150 denarë, këtë e thashë edhe publikisht dhe ja shohim edhe tani se është ulur. 6-7 denarë prodhuesit llogarisin vetëm për prodhimtari dhe shpenzime të tjera që i japin ndaj supermarketeve në vit”, tha Kreshnik Bekteshi, ministër i Ekonomisë.

Paraprakisht, pas reagimeve të ashpra se disa produkte ushqimore u bënë me çmime të reja më të larta kur skadoi afati i pakos masash qeveritare për ballafaqim me krizën, para disa ditësh Qeveria sërish i ngriu marzhat e produkteve bazë ushqimore, kurse çmimet nëpër dyqane nga dje filluan të shënojnë rënie.

Një ditë pas vendosjes së masës, çmimi i vajit dhe makaronave u ul për rreth 10 denarë, e tani dukshëm ra edhe çmimi i qumështit. Autoritetet kompetente sigurojnë se tendenca e uljes do të vazhdojë.  

Inspektorati ka afat deri të hënën të dorëzojë raporte lidhur me atë nëse është ulur marzha e produkteve bazë, siç janë: buka, vezët, qumështi dhe vaji gatimi. Në qoftë se çmimet nuk janë ulur, nuk përjashtohet mundësia për ulje shtesë të marzhës, si dhe zgjerim të listës së produkteve me marzhe të ngrira.