Çështje urgjente dhe e jashtëzakonshme. Kështu i vlerëson qeveria dyshimet e dala pas një investigimi të IRL se në vendin tonë hyjnë derivate toksike të naftës të rrezikshme për shëndetin dhe mjedisin, e që gjatë importit kanë hyrë si mazut që është përdorur për ngrohje nga institucione shtetërore dhe kompani private.
“Që të zbardhen të gjitha çështjet, dilemat dhe dyshimet qeveria e ka obliguar Drejtorinë e Doganave që të bëjë kontroll të brendshëm për rastin konkret, që të shqyrtohet se sa sasi e këtyre derivateve të naftës është importuar nga 2018-ta deri në 2020-tën dhe sipas cilës shifër doganore është bërë importimi dhe nëse të dhënat nga deklaratat përputhen me derivatin e importuar”, tha zëdhënësi i Qeverisë, Dushko Arsovski.
Qeveria po ashtu ka obliguar Inspektoratin e Tregut, që bashkë me byronë për standardizim dhe me ndihmën e laboratorit të lëvizshëm, të kryejnë inspektim të jashtëzakonshëm në kompanitë importuese derivatin si dhe institucionet që e kanë përdorur lëndën djegëse.
Edhe Inspektorati i Mjedisit do të kryejë inspektime tek kompanitë që importojnë ose përdorin mazut. Ministria e Ekonomisë nga ana tjetër është obliguar të shohë se çfarë saktësisht kontrollohet kur derivatet hyjnë në vendin tonë dhe nëse ato janë sipas standardeve evropiane. Krejt këto duhet të bëhen në afat dy javor.
Nga koalicioni opozitar Aleanca për Shqiptarët-Alternativa thonë se Qeveria me vetëdije dhe më qëllim përfitimi ka helmuar qytetarët e saj për tre vite me radhë.
“Qeveria LSDM-BDI në vitet 2018 dhe 2019 kur Shkupi, Tetova dhe Kavadari ishin qytetet më të ndotura në botë, Ministri i Mjedisit Sadulla Duraku dhe Zëvendëskryeministri Koço Angjushev i akuzonin qytetarët se po e ndotin ajrin si pasojë e ngrohjes me dru, por sot u kuptua se ata paskan qenë ndotësit dhe vrasësit e vërtetë të qytetarëve duke i helmuar me vetëdije me qëllim të përfitimit personal”, u shpreh nënkryetarja e ASh-së, Bujare Abazi.
Kërkojnë po ashtu që Prokuroria të ndërmerr masa me qëllim identifikimin e fajtorëve. Për këtë dje reagim pati edhe nga opozitarja VMRO-DPMNE të cilët pyetën qeverinë se kush do të mbajë përgjegjësi për skandalin dhe nëse qeveria vetë është e përfshirë në importimin e vajrave toksikë dhe pse ka heshtur deri më tani për këtë./TV21