Qëndrime të ndara për punësimet etnike, Bekteshi apelon: Politikanët ta lexojnë programin qeveritar

Pas prezantimit të projekteve për katër vitet e ardhshme, theksi kryesor në konferencën për media të ministrit të Ekonomisë ishin punësimet etnike. Në lidhje me këtë temë, Bekteshi e përsëriti qëndrimin e djeshëm. Punësime në bazë të përkatësisë etnike do të ketë, por siç tha ai, Qeveria po shqyrton më shumë mundësi që masa të fillojë të realizohet vitin e ardhshëm. Në lidhje me komentet e politikanëve dhe analistëve, Bekteshi apeloi që ata ta lexojnë programin e Qeverisë.

 “Kjo vlen edhe për politikanët, të lexojnë programet qeveritare para se të japin koment, posaçërisht ata që e kanë marrë besimin që të jenë në pushtet në mandatin katër vjeçar. Nëse nuk e dinë, është faqja 39, paragrafi 3, në programin e Qeverisë. Duhet ta lexojnë për shkak se për atë program edhe ata kanë votuar”, deklaroi Kreshnik Bekteshi – Ministër i Ekonomisë.

Komenti i tij vjen pasi që mbrëmë lideri i Besës, Bilall Kasami, në emisionin Klik Plus, në TV21, tha se kompanitë private duhet të zbatojnë dygjuhësinë për shkak se një pjesë e shqiptarëve të diplomuar nuk flasin gjuhën maqedonase.

Masa për punësime etnike sipas ministrit të Ekonomisë do të thotë inkurajim shtesë për kompanitë, ndërsa në lidhje me atë se sa para do të nevojiten, Bekteshi tha se do të duhet të bëhen projeksione shtesë në propozim-Buxhetin e vitit 2021. Për projeksionet e FMN-së për rënien e BPV, Bekteshi tha se ka shpresë që projeksionet e Ministrisë së Financave të mbeten deri në fund të vitit.

 “Nëse bëjmë krahasim me shtetet e rajonit, disa tashmë po realizojnë setin e dytë apo të tretë të masave ekonomike. Të dhënat që po i marrim nga Ministria e financave tregojnë se gjithë set masat e ndërmarra kanë qenë të suksesshme. Në lidhje me rënien ekonomike, besoj se projeksionet e Ministrisë së financave do të ngelin deri në fund të vitit”, theksoi Kreshnik Bekteshi – Ministër i Ekonomisë.

Themelimi i kompanive me shumë totale prej një euro do të jetë një prej prioriteteve të ministrit të Ekonomisë. Me këtë masë, siç theksoi Bekteshi, hapet mundësia që qytetarët me shpenzime minimale të realizojnë biznes-idetë e tyre. Njeriu i parë i Ekonomisë paralajmëroi edhe krijimin e regjistrit për shpenzime para-fiskale, i cili ka për qëllim uljen e këtyre shpenzimeve për 75 për qind dhe nivelizimin e tyre në përputhje me madhësinë e ndërmarrjeve sipërmarrëse. Ai gjithashtu paralajmëroi edhe transformim të sektorit energjetik.