Serbia që nga 1 maji të gjithë qytetarët e saj të vaksinuar kundër Covid-19 do t’i pajisë me certifikat digjitale për covid. Kryeministrja e Serbisë, Ana Bërnabiq tha se certifikatën ia kanë paraqitur edhe Organizatës Botërore të Shëndetësisë, ndërsa shpreson që kjo do t’ju mundësojë qytetarëve të Serbisë, lëvizje të lirë pa pasur nevojë për PCR test.
“Nga e shtuna Republika e Serbisë për të gjithë qytetarët e saj të cilët janë vaksinuar dhe rivaksinuar do të kenë certifikatë digjitale covid. Ne kemi punuar mbi atë dhe e kemi shpërndarë certifikatën tonë edhe me Organizatën Botërore të Shëndetësisë dhe me një numër të madh të vendeve të ndryshme siç janë Izraeli dhe Hungaria dhe mendoj se ato janë të gatshëm t’i pranojnë këto certifikata”, deklaroi kryeministrja e Serbisë, Ana Bërnabiq.
Ndërkohë që dje Parlamenti Evropian e miratoi kornizën negociuese për pasaportat shëndetësore. Këto pasaporta do të mundësojnë lëvizje pa pengesë mes vendeve të BE-së. Dokumenti do të quhet EU Covid-19 certifikatë dhe do të vlejë 12 muaj, i njëjti do të konfirmojë nëse personi është i vaksinuar, ka test negativ ose e ka kaluar virusin.
“Në fillim, para verës duhet të vendosim certifikatën në nivel të Bashkimit Evropian. Ndërsa pas kësaj të fillojmë bisedimet me vendet e treta, kuptohet me partnerët tanë nga Ballkani perëndimor të shohim se si mund të harmonizojmë dokumentet që të pranohet certifikatat për vaksinimin, testin negativ ose edhe se personi e ka kaluar virusin”, Didie Rejnders, eurokomisioner për Drejtësi.
Bisedimet me vendet e Ballkanit Perëndimor për njohjen e ndërsjellë të certifikatave të tilla duhet të fillojnë në qershor, ndërsa fjalën e fundit do ta ketë Këshilli Evropian. Ndërkohë që Italia, Austria, Franca, Danimarka, Franca dhe Britania e Madhe janë vetëm disa nga vendet të cilat kanë vendosur një lloj certifikatë covidi brenda vendeve të tyre, të cilët ju mundësojnë qytetarëve lëvizje të lirë në vend, hyrje e lirë nëpër restorante, kinema e hotele.