Punëtorët tanë s’janë aq produktivë sa ata në BE! Trendafillov: Nëse nuk i paguan, nuk ka produktivitet

Në Maqedoni duhet të punojnë dy punëtorë që të arrijnë produktivitetin e një punëtori europian. Këtë e kanë treguar hulumtimet e punëdhënësve në vend. Ata thonë se i respektojnë ligjet dhe kanë zbatuar harmonizimin ligjor me të cilin paga minimale u rrit për 1.800 denarë.

“Produktiviteti i punëtorëve tanë është 50% i produktivitetit të punëtorëve në Bashkimin Europian, që do të thotë se për një punëtor europian duhen dy punëtorë tanë. Ky është problem jo vetëm i punëtorëve por edhe i kompanive, sidomos të vogla dhe të sapoformuara, të cilat nuk është se nuk duan të kenë vende pune më produktive dhe kompani më të suksesshme, por përballen me problemin e konkurrencës”, tha Vlladanka Trajkoska.

Sindikalistët mbeten në kërkesën që paga minimale të rritet në 500 euro dhe të rriten edhe pagat e tjera. U dërguan mesazh punëdhënësve se për rritjen e produktivitetit duhet të rrisin pagat. Ata thonë se revolta tek punëtorët është e madhe sepse janë më pak të paguarit në Ballkan dhe Evropë.

“Nëse planifikojnë të vazhdojnë t’i paguajnë ashtu siç bëjnë sot, nuk mund të presin as rritje të produktivitetit për një arsye: punëtorët tanë në Mal të Zi, Serbi, Kroaci, Slloveni, Gjermani, Austri janë produktivë. Por pse? Sepse atje pagat janë tri ose katër herë më të larta se tonat”, deklaroi Sllobodan Trendafilov.

Nga qeveria thonë se do të respektojnë gjithçka që punëdhënësit dhe sindikatat do të bien dakord.

“Baza e këtij dialogu social është edhe ligji që sot respektohet për pagën minimale dhe ne maksimalisht dhe korrekt e zbatojmë atë ligj. Për ndryshime të tjera ligjore që mund të vijnë më vonë, pritet të ketë dialog social”, tha Marjan Risteski.

Por prej muajsh nuk ka dialog social, as Këshill Ekonomik-Social, sepse ende nuk është përcaktuar përfaqësueshmëria e sindikatave. Me këtë, me harmonizimin ligjor, paga minimale në mars u rrit për 1.800 denarë dhe tani është 24.400 denarë, duke mbetur ndër më të ulëtat në rajon.